ആദിശങ്കരൻ ഹരിശ്രീ കുറിച്ച സരസ്വതി ക്ഷേത്രം

സ്വയംഭൂ ശിലയിലെ ചൈതന്യം

- എ.എൻ. മനയ്ക്കൽ

എറണാകുളം ജില്ലയിലെ നെടുമ്പാശ്ശേരി ഗ്രാമപഞ്ചായത്തിലുള്ള ആവണംകോട് പ്രദേശത്ത് സ്ഥിതി ചെയ്യുന്ന സരസ്വതി ക്ഷേത്രമാണ് ആവണംകോട് സരസ്വതി ക്ഷേത്രം. നെടുമ്പാശ്ശേരി അന്തർദേശീയ വിമാനത്താ വളത്തിനോട് ചേർന്നുകിടക്കുന്ന ഈ ക്ഷേത്രഭൂമിയിൽ ജഗദ്ഗുരു ശ്രീശങ്കരാചാര്യരുടെ പാദ സ്പർശമേറ്റ മണൽത്തരികൾക്ക് പറയാൻ ഒട്ടേറെ കഥകളുണ്ട്.

സ്വയംഭൂ ശിലയിലെ ചൈതന്യം

ശാന്തസ്വരൂപിണിയായ കുമാരിയാണ് ഇവിടെയു ള്ളത്. 108 ദുർഗ്ഗാക്ഷേത്രങ്ങളിൽ ഒന്ന്, ആയിരത്തി ഇരുന്നൂറോളം വർഷങ്ങളുടെ പഴക്കമാണ് ക്ഷേത്രത്തിന് കൽപ്പിക്കപ്പെടുന്നത്. ഇതിൽ എഴുതപ്പെട്ട ചരിത്രം വച്ച് എഴുന്നൂറിലേറെ വർഷങ്ങളായി നടക്കുന്ന ഉത്സവമാണ് ആറാട്ടുപുഴ പൂരം. ഇതിൽ 108 ദുർഗാക്ഷേത്രങ്ങൾ പങ്കെടുത്തിരുന്നു എന്നാണ് ചരിത്ര രേഖകൾ, വേങ്ങൂർ, മാണി തമംഗലം, ചെങ്ങൽ, എടാട്ട്, ആവണംകോട്, നായ ത്തോട്, എഴുപ്പുറം, ഇരിങ്ങോട് തുടങ്ങിയ ക്ഷേത്രങ്ങളുടെ സാന്നിധ്യം ആറാട്ടുപുഴ പൂരം രേഖകളിൽ കാണാം. അതിൽ നിന്നു തന്നെ 700 വർഷത്തെ പഴക്കം ആവണംകോട് സരസ്വതി ക്ഷേത്രത്തിൽ രേഖാപരമായുണ്ട്. വർഷത്തിൽ മഹാനവമി ദിവസം മാത്രമാണ് ഇവിടെ എഴുത്തിനിരുത്ത് ഇല്ലാത്തത്. മറ്റെല്ലാ ദിവസവും കുട്ടികളെ എഴുത്തിനിരുത്തുന്ന ക്ഷേത്രം കൂടിയാണിത്.