കണ്ണന്റെ വിരൽസ്പർശമുളള അഷ്ടപദി

ഗീതാഗോവിന്ദത്തിലെ ഓരോ വരികളും കണ്ണന് എത്ര പ്രിയപ്പെട്ടതാണ് എന്ന് അഷ്ടപദി കേട്ടുറങ്ങുന്ന കണ്ണനെ കാണുമ്പോൾ, ഓരോ ശ്രീകൃഷ്ണ ക്ഷേത്രത്തിലും ചെല്ലുമ്പോൾ അന്ന് കണ്ണൻ വന്ന് എഴുതി വെച്ച് വരികളും നമ്മൾ കേൾക്കുന്നുണ്ടല്ലോ എന്ന് നമ്മൾ ഓർക്കാറില്ലെ.....

- ബാബുരാജ് പൊറത്തിശ്ശേരി 9846025010

ശ്രീകൃഷ്ണക്ഷേത്രങ്ങളിൽ എല്ലാംതന്നെ അദ്ദേഹ ത്തിന്റെ ഉച്ചയുറക്കത്തിനും മറ്റ് ചിലപ്പോൾ ഉണർത്തുപാട്ടായും അഷ്ടപദി പാടുന്നത് നിങ്ങളെല്ലാം കേട്ടിട്ടുണ്ടാകുമല്ലോ? അഷ്ടപദി രചിച്ചത് ഭഗവാന്റെ ആദ്യഭക്തനും ശുദ്ധനും അതിലുപരി കണ്ണനെ ഹൃദയത്തിലേറ്റിയ ആളുമായ ജയദേവകവികൾ ആയിരുന്നു എന്ന് ഏവർക്കും അറിയാം. എന്നാൽ അഷ്ടപദി യിലെ വരികളിൽ കണ്ണന്റെ വിരൽസ്പർശം ഉണ്ട് എന്ന് എത്രപേർക്ക് അറിയാം.?

ഒരിക്കൽ പുരി ജഗന്നാഥ ക്ഷേത്ര ദർശനത്തിന് പോയ ശ്രീ ജയദേവന് കൃഷ്ണനും രാധയുമായുളള വൃന്ദാവനകേളികളുടെ സ്വപ്നദർശനം ഉണ്ടാകുകയും അദ്ദേഹം അത് കവിതയാക്കാൻ തീരുമാനിക്കുകയും ചെയ്തു എന്നാണ് ചരിത്രം.

ജയദേവൻ ഭക്തിരസത്തിൽ മുഴുകി രാധയുമായുളള കണ്ണന്റെ പ്രേമലീലകൾ എഴുതിക്കൊണ്ടിരിക്കെ ഒരു കവിതയുടെ വരികൾ എത്ര ആലോചിച്ചിട്ടും എഴുതാൻ കഴിഞ്ഞില്ല.

"സ്മരള ഖണ്ഡനം മമ ശിരസി മണ്ഡനം' എന്ന വരി പൂർത്തിയാക്കാൻ കഴിയാതെ വിഷണ്ണനായിരുന്ന ജയദേവനോട് സാധ്വിയും പതിവ്രതാ രത്നവുമായ ഭാര്യ പത്മാവതി ഇപ്രകാരം പറഞ്ഞു.

അങ്ങ് ഗംഗയിൽ പോയി കുളിച്ച് പൂജാ പ്രാർത്ഥനകൾ നടത്തി കണ്ണനോട് പ്രാർത്ഥിക്കൂ. അപ്പോൾ വരി എഴുതാൻ കണ്ണൻ സഹായിക്കും. ജയദേവൻ ഈ ആശയം സ്വാഗതം ചെയ്തു. ഗംഗ അദ്ദേഹത്തിന്റെ വീട്ടിൽ നിന്നും കുറച്ച് അകലെയാണ്.