எலும்பு வலிமை இழப்பு காரணமும் தீர்வும்!

சமீபகாலமாக நான்கில் ஒரு ஆணும், சா இரண்டில் ஒரு பெண்ணும் எலும்பு வலிமை இழப்பு (ஆஸ்டியோபோரோசிஸ்) பிரச்னையில் பாதிக்கப்படுவதாக ஆய்வுகள் தெரிவிக்கின்றன.

- அகிலா ரவிக்குமார்,ஸ்ரீதேவிகுமரேசன்

ஆஸ்டியோபோரோசிஸ் என்றால் என்ன? அதற்கான சிகிச்சை முறைகள் என்ன? தீர்வு என்ன என்பது குறித்து நம்முடன் பகிர்ந்து கொள்கிறார் மூத்த மருத்துவர் அகிலா ரவிக்குமார்.

ஆஸ்டியோபோரோசிஸ் என்பது என்ன? யாருக்கெல்லாம் ஏற்படலாம்?

எலும்பிலுள்ள பொருள் திணிவு (bone mass) குறையும்போது அது தன் வலிமையை இழக்கிறது. இதையே எலும்பு வலிமை இழத்தல் (osteoporosis) நோய் என்கிறோம். இந்தப் பிரச்னை வந்துவிட்டால், சாதாரணமாக நடக்கும் போது, சிறிதாக தடுக்கி விழுந்தாலும் கூட எலும்பு முறிவு ஏற்படும்.

பொதுவாக வயதானவர்களுக்குதான் ஆஸ்டியோபோரோசிஸ் ஏற்படுவதற்கு வாய்ப்புகள் அதிகம். ஏனென்றால், நமது உடலானது எலும்புக்களைப் புதுப்பித்துக் கொண்டே இருக்கிறது. இளமையில் இது வேகமாக நிகழ்கிறது. வயதாகும்போது, எலும்பானது வலிமையை இழக்கிறது.

யாருக்கெல்லாம் வரும் என்றால், ஆண், பெண் இருவருக்குமே வரலாம். ஆனால், ஆண்களைவிட பெண்களுக்கு இந்தத் தொல்லை அதிகம் ஏற்படுகிறது. ஏனென்றால், ஆணின் உடலமைப்பும் பெண்ணின் உடலமைப்பும் வெவ்வேறாக இருப்பதனால், எலும்புகளின் தண்மையும் வெவ்வேறாக இருக்கிறது. மேலும், ஈஸ்ட்ரோஜன் ஹார்மோன் சுரப்பு பெண்ணுக்கு இருப்பதாலும், எலும்பு வலிமை இழப்பு ஆண்களை காட்டிலும் பெண்களுக்கு அதிகமாக இருக்கிறது. அதிலும் குறிப்பாக பெண்களுக்கு மாதவிடாய் நிற்கும் காலத்தில் ஈஸ்ட்ரோஜன் ஹார்மோன் குறைவதால் எலும்பு எளிதில் பலவீனம் அடைகிறது. மாதவிடாய் சீக்கிரம் நின்றுவிடும் பெண்கள், மாதவிடாய் நிற்கும் காலத்தில் குறைந்த எடையுள்ள பெண்கள், கால்சியம் சத்துள்ள உணவை குறைவாக உண்ணுபவர்களுக்கு, ஸ்டீராய்டு பிரச்னை உள்ளவர்களுக்கு இத்தொல்லை வர வாய்ப்புகள் அதிகம். பெற்றோரில் யாருக்காவது இந்தப் பிரச்னை இருந்தால், அவர்களின் பிள்ளைகளுக்கும் வரலாம்.

இதைத்தவிர, குடும்பத்தில் உள்ள மற்றவர்களை கவனிப்பது போல் பெண்கள் தங்களை கவனித்துக் கொள்ள மாட்டார்கள். ஒழுங்காக சாப்பிட மாட்டார்கள். நேரத்திற்கு சாப்பிட மாட்டார்கள். சத்தான உணவுகளையும் அவ்வளவாக எடுத்துக் கொள்ள மாட்டார்கள். இதுவும் பெண்களுக்கு ஆஸ்டியோபோரோசிஸ் அதிகம் ஏற்பட ஒரு காரணமாகிறது.