‘ખિલાડી કુમાર’ને આ ખબર છે ખરી?

ગુજરાત કૂડો એસોસિયેશન હેઠળ ચાલતા અમદાવાદ કૂડો ચેપ્ટરમાં અઢળક ગેરરીતિઓ સામે આવી છે. આ ચેપ્ટર હેઠળ છેલ્લાં છ-સાત વર્ષોમાં લાખો રૂપિયાનું કૌભાંડ થયું હોવાના પુરાવા મળી આવ્યા છે. વધુમાં આ ચેપ્ટર એ કૂડો ઇન્ટરનેશનલ ફેડરેશન ઈન્ડિયા હેઠળ આવે છે, જેના ચૅરમેન ખુદ બોલિવૂડ સુપરસ્ટાર અક્ષયકુમાર છે. આ ફેડરેશનને ભારત સરકારના રમત-ગમત અને યુવા બાબતોના મંત્રાલય દ્વારા ગ્રાન્ટ પણ આપવામાં આવે છે, જેના કારણે મામલો વધુ ગંભીર બન્યો છે.

- આર્જવ પારેખ

દેશના સર્વાંગી વિકાસ માટે એ પાયાની પ્રાથમિક જરૂરિયાત છે કે દેશ ભ્રષ્ટાચાર, લાંચ-રિશ્વત જેવાં દૂષણો પર લગામ લગાવે, પરંતુ વારે-તહેવારે બિલાડીના ટોપની માફક એવા લોકો ફૂટી જ નીકળે છે જેને કાયદાનો ડર હોતો નથી અને ઊધઈની માફક વ્યવસ્થામાં સડો ઉત્પન્ન કરે છે. આવા લોકો ભ્રષ્ટાચાર કરી, ખોટી રીતે લોકોના પૈસા ખાઈને દેશમાં થઈ રહેલી સારી પ્રવૃત્તિઓને પણ બગાડવાનું કામ કરે છે. આવું જ એક મોટું કૌભાંડ અમદાવાદમાં થઈ રહ્યું છે.

પૃષ્ઠભૂમિ

આ વાત છે KIFI – કૂડો ઇન્ટરનેશનલ ફેડરેશન ઇન્ડિયાની કે જેની સ્થાપના ૨૦૧૧ની સાલમાં થઈ હતી. આ એસોસિયેશન ફૂડો રમત માટે ભારતની એકમાત્ર ગવર્નિંગ બૉડી છે. ફૂડો એક એવી રમત છે જે સ્પોર્ટ્સ કરાટે, જૂડો, જુજુત્સુ અને કિબોક્સિંગનો વૈજ્ઞાનિક, આધુનિક અને પ્રાયોગિક રીતે સમન્વય કરે છે. આ ઍસોસિયેશનની સ્થાપના જકૂચો તકાશી અઝુમા અને શિહાન અક્ષયકુમારના વડપણ નીચે કરવામાં આવી છે. આ ઍસોસિયેશન નીચે દેશનાં ૩૦ રાજ્યો અને કેન્દ્રશાસિત પ્રદેશોમાં સ્ટેટ યુનિટ્સ ચાલે છે. ગુજરાતમાં ગુજરાત કૂડો સ્પોર્ટ્સ એસોસિયેશન ચાલે છે, જેના પ્રેસિડેન્ટ પદે દારાયસ બી. કૂપર છે. આ એસોસિયેશન નીચે રાજ્યના આઠ જિલ્લાઓ અમદાવાદ, ભરૂચ, નવસારી, પોરબંદર, સાબરકાંઠા, સુરત, વલસાડ, વડોદરામાં બ્રાન્ચ ચાલે છે. જેમાં અમદાવાદ બ્રાન્ચના પ્રેસિડેન્ટ પ્રવીણ જાદવ છે જે અમદાવાદમાં મુખ્ય કોચ પણ છે.

મામલો શું છે?

અમદાવાદના સેટેલાઇટ પોલીસ સ્ટેશનમાં કંચનબહેન બહલ દ્વારા એક ફરિયાદ નોંધાવવામાં આવી છે. ત્યાર પછી આ મામલો પ્રકાશમાં આવ્યો છે. એમનો પૌત્ર પ્રીત શ્રેયસ ફાઉન્ડેશનમાં કરાટે શીખવા માટે દાખલ થયેલો. જેની ફી માસિક ૮૦૦ રૂપિયા તેઓ ભરતા હતા. શ્રેયસ ફાઉન્ડેશન તેની રસીદ પણ આપે છે, પરંતુ વાત એમ છે કે શ્રેયસ ફાઉન્ડેશનમાં પ્રવીણ જાદવ કરાટે ટ્રેનિંગના હેડ કોચ છે એ પોતે કૂડો એસોસિયેશન અમદાવાદ ચેપ્ટરના ઇન્ચાર્જ છે. આ વ્યક્તિ અહીં કરાટે રમવા આવતાં બાળકોને ફૂડો રમવા માટે પ્રેરે છે, કારણ કે તેનો પોતાનો અંગત સ્વાર્થ કૂડો સાથે જોડાયેલો છે.

પ્રવીણ જાદવ, કોચ