પ્રિયતમા

લિફ્ટમાં ફરી પંદરમા માળેથી એ કદરૂપો માણસ ચડ્યો અને મારી સામે પરિચિત હોય એમ સ્મિત આપ્યું. આ પુરુષોની જાત જ એવી. જરાક દેખાવડી કે સ્માર્ટ સ્ત્રી જોઈ નથી કે પાછળ પડ્યા નથી!

- એકતા દોશી

તે દિવસે નવી ઓફિસમાં મારો પહેલો દિવસ હતો. એક મેટ્રો સિટીમાં આવવાનો પણ પહેલો અનુભવ. અધધધ વસ્તી ધરાવતું અજાણ્યું શહેર અને એમાં મોટી કંપની, ઉત્સાહની સાથે-સાથે થોડીક ગભરામણ પણ થતી હતી. અજગર જેવી સડકો અને એના ઉપરનાં ટપકાં જેવા ક્યારેય ખતમ ન થનાર વાહનો. બસમાં બેઠી બેઠી હું મારી આંખોમાં વિસ્મય આંજી રહી. મારું સ્ટોપ આવી ગયું, હું એક મોટા બિલ્ડિંગ પાસે પહોંચી, તેમાં આવેલી પ્રખ્યાત કોર્પોરેટ કંપનીની ઓફિસમાં પચીસમા માળે મારે આજથી કામ કરવાનું હતું. હું થોડી નર્વસ થઈ બધું જોતી રહી. હું લિફ્ટમાં જવા માટે હું બટન દબાવી ઊભી રહી. લિફ્ટ ખૂલી, થોડીવારમાં તો વીસેક માણસોથી ભરાઈ પણ ગઈ. દરવાજો બંધ થવામાં હતો એ જ સમયે એક માણસ દોડીને આવ્યો અને અંદર ઘૂસ્યો, બરોબર મારી પાસે આવીને સૂગ ચડી ઊભો રહ્યો. હું જરાક સંકોચાઈ એટલે એણે મારી સામે સ્મિત આપ્યું. અરર, કાળો ડિબાંગ રંગ, એમાં સફેદ દાંત દેખાય. મને આવી. મારો ઓફિસમાં જવાનો ઉત્સાહ થોડો મંદ પડી ગયો. કારણ વગર મારી નજર ઘડીઘડી એ માણસ ઉપર જ પડતી હતી. ઠીકઠાક ગોઠવેલા વાળ, આછા બ્લ્યુ શર્ટ ઉપર નેવી બ્લ્યુ ટાઈ અને બ્લેક ફોર્મલ પેન્ટ, ફોર્મલ શૂઝ અને હળવી મહેકવાળું પરફ્યુમ, ખાસ્સો સ્માર્ટ હતો, પણ ચહેરો, હાય રામ! પંદરમો માળ આવ્યો અને એ ઊતર્યો. મને હાશકારો થયો કે આ મારી ઓફિસમાં તો સાથે કામ નથી કરતો, આખો દિવસ તો મોઢું નહિ જોવું પડે. પચીસમો માળ પણ આવી ગયો.

નવી જગ્યા, નવા લોકો, નવું કામ, આખો દિવસ ઉત્સાહમાં ગયો. મારી સાથે મિત્રતા કરવા માટે ઘણા હાથ લંબાયા અને મેં પણ હાથ મેળવ્યા. એકંદરે હું ઓછા બોલી એટલે જલદી મિત્રતા ન કરી શકું, પણ સહકર્મીઓ અને ઓફિસનું વાતાવરણ મને એકદમ ગમી ગયું. સાંજે હું ઘરે પાછી જવા માટે નીકળી. લિફ્ટમાં ફરી પંદરમા માળેથી એ કદરૂપો માણસ ચડ્યો અને મારી સામે પરિચિત હોય એમ સ્મિત આપ્યું. સાલી, પુરુષોની જાત જ એવી. જરાક દેખાવડી કે સ્માર્ટ સ્ત્રી જોઈ નથી કે પાછળ પડ્યા નથી. બધી સ્ત્રીઓને પોતાની પ્રોપર્ટીની જેમ જુએ. શું સમજતો હશે આ પોતાના મનમાં! છુપા તિરસ્કારથી મેં એના સ્મિતને અવગણ્યું. લિફ્ટ ખૂલી અને અમે બધાં બહાર નીકળ્યાં. હું બસસ્ટોપ ઉપર મારી બસ આવવાની રાહ જોતી ઊભી હતી અને મારી પાસે એક બાઇક આવીને ઊભું રહ્યું,