ગુજરાતમાં હિન્દુત્વના મુદ્દે હરીફાઈનું વિકાસકારણ

૨૦૧૭માં ગુજરાતના કહેવાતા વિકાસની ઠેકડી ઉડાડી હતી અને ભાજપને ૧૮૨ બેઠકમાંથી ૯૯ બેઠક સુધી લાવી મૂક્યો હતો. હવે આજે ફરી એક વાર વિકાસનું રાજકારણ ચકરાવે ચડ્યું છે

- હેમન્તકુમાર શાહ

ગુજરાતની વિધાનસભાની ૨૦૨૨ની ચૂંટણી દેશના રાજકારણ માટે મહત્ત્વની બની રહેશે એમાં કોઈ જ શંકા નથી. એક એવી વાયકા ઊભી થઈ ગઈ છે કે જો નરેન્દ્ર મોદી ગુજરાતમાં હારી જાય તો તેઓ દેશમાં પણ હારી જાય. મોદી એટલે ભાજપ અને ભાજપ એટલે મોદી એવું જે સમીકરણ દેશના રાજકારણ ઊભું થયું છે તેના સંદર્ભમાં આ વાયકા મહત્ત્વની છે અને તેથી ૨૦૨૪ની લોકસભાની ચૂંટણીનું પરિણામ ગુજરાતની આ ચૂંટણીના પરિણામ પર ઘણુંબધે અંશે આધાર રાખે છે.

ત્રીજો પક્ષઃ આપનો પ્રવેશ

ગુજરાતના ચૂંટણીકારણ વિષે એમ કહેવામાં આવે છે કે ગુજરાતમાં કોંગ્રેસ અને ભાજપ સિવાય ત્રીજો કોઈ પક્ષ ચૂંટણીમાં વિજયી બનતો નથી અને ગુજરાત દ્વિપક્ષીય રાજકારણને વરેલું બની ગયું છે, પરંતુ ૨૦૨૨ની ચૂંટણીમાં એક ત્રીજો પક્ષ આપ વિધાનસભામાં બહુ ધમાકેદાર પ્રવેશ માટેનું પરિબળ બની ગયું છે. આપ કેટલી બેઠકો જીતે છે અથવા તે સરકાર બનાવે છે કે નહિ તે તો સમય જ કહેશે, પરંતુ જે રીતે આ ચૂંટણીમાં આપ દ્વારા પ્રચાર થઈ રહ્યો છે તે પોતે જ એક મોટું પરિબળ બની ગયું છે. તે પોતે વિધાનસભામાં બહુમતી ના પણ મેળવે તો પણ તે ભાજપ અને કોંગ્રેસ બંનેને નુકસાન પહોંચાડી શકે છે અને જેને ઓછું નુકસાન પહોંચશે તે બહુમતી મેળવશે એ નક્કી છે.

૨૦૧૨માં ભાજપના જ મુખ્યપ્રધાન કેશુભાઈ પટેલે પોતાનો અલગ પક્ષ ગુજરાત પરિવર્તન પાર્ટી (જીપીપી) બનાવીને ચૂંટણીમાં ઝંપલાવ્યું હતું અને તેમણે ભાજપને પડકાર ફેંક્યો હતો. જોકે, તેમાં કેશુભાઈ પટેલ ઉપરાંત એક એમ બે જ બેઠકો પર તેમનો પક્ષ વિજયી બન્યો હતો. તે પછી દસ વર્ષે પહેલી વાર વિધાનસભાની ચૂંટણીમાં ત્રિપાંખિયો જંગ થઈ રહ્યો છે અને તે ભાજપ માટે આપ કેશુભાઈ પટેલ કરતાં વધુ પડકાર ઊભો કરી રહ્યો છે. લોકમુખે એમ સતત કહેવાઈ રહ્યું છે કે ભાજપ આપ દ્વારા આવેલા પડકારથી ગભરાઈ ગયો છે અને દેખાય છે પણ એવું જ. ભાજપ જેટલા હુમલા આપ પર કરે છે તેટલા તે કોંગ્રેસ ૫૨ કરતો નથી. જોકે, કોંગ્રેસનો આરોપ છે કે આપ ભાજપની બી ટીમ છે, પણ પહેલી વાર આપ ભાજપને હરાવવા મેદાને પડ્યો છે, કારણ કે દિલ્હી અને પંજાબમાં તો સત્તાધારી પક્ષ કોંગ્રેસ હતો અને તેણે તેને હરાવવાનો હતો.