ફૂટબોલ વિશ્વકપ માટે સજ્જ કતાર

આરબ દેશોમાં યોજાનારો આ સર્વ પ્રથમ ફીફા કપ છે. આટલો મોટો ફિજૂલ ખર્ચ કરવાનું કતાર જેવા દેશને પોષાય, કારણ કે દુનિયામાં એ સૌથી વધુ માથાદીઠ આવક ધરાવતો દેશ છે

- વિનોદ પંડ્યા

આ વીસ નવેમ્બર રવિવારના રોજ ખાડીના દેશ કતાર ખાતે જગતના રમતગમતના આજ સુધીના ઇતિહાસમાં યોજાયો ન હોય તેવો ભવ્યાતિભવ્ય રંગારંગ, જગતને આંજી નાખે એવો ઉદ્ઘાટન સમારંભ યોજાશે. તેનું ખાસ કારણ છે. કારણ કે હમણાં સુધી દર ચાર ચાર વરસે ફેડરેશન ઑફ ઇન્ટરનેશનલ ફૂટબૉલ એસોસિયેશન્સ (ફીફા) દ્વારા વિશ્વ કપ સ્પર્ધાઓ યોજાઈ છે. તેમાં યજમાન દેશે ત્રણથી ચાર અબજ ડૉલરનો ખર્ચ કર્યો હતો. ૨૦૧૮માં રશિયા યજમાન હતું અને સાડા ત્રણ અબજ ડૉલર વાપર્યા હતા. છતાં રશિયાના એ ફૂટબૉલ મહોત્સવને આજ સુધીમાં શ્રેષ્ઠ રીતે યોજાયેલો ગણવામાં આવ્યો છે અને હવે કતારની વાત. વરસ ૨૦૨૨ના કપના આયોજનમાં કતાર રશિયાથી લગભગ નેવુંથી સો ગણો ખર્ચ કરી રહ્યું છે. બ્લુમબર્ગના રિપોર્ટ પ્રમાણે કતાર ત્રણસો અબજ ડૉલર વાપરશે. જ્યારે સત્તાવાર આંકડો કહે છે કે ત્રણસો વીસ અબજ ડૉલર વપરાશે. ભારત પાસે જે ડૉલર (વિદેશી હૂંડિયામણ) રિઝર્વ છે તેની લગભગ અરધોઅરધ ૨કમ કતાર એક ફૂટબૉલ સ્પર્ધાના આયોજન માટે વાપરી નાખશે. જેમ એક અતિ શ્રીમંતને ત્યાં યોજાતાં લગ્ન તે શહેર, રાજ્ય કે દેશ માટે ચર્ચાનો વિષય અને માણવાલાયક જોણું બની જાય છે તેમ આ ટચૂકડા દેશના યજમાનપદે યોજાઈ રહેલો કપ દુનિયાના સાડા ત્રણથી ચાર અબજ લોકો નિહાળશે એવો અંદાજ છે. રશિયાનો વર્લ્ડ કપ સાડા ત્રણ અબજ લોકોએ નિહાળ્યો હતો.

કતારના શહેર દોહા ખાતે પુરજોશમાં તૈયારીઓ ચાલી રહી છે. ૨૦ નવેમ્બરથી ૧૮ ડિસેમ્બર સુધી, લગભગ એક મહિનો આ સ્પર્ધા યોજાશે, જેમાં ફીફાના ૩૨ સભ્ય દેશોની ટીમો ભાગ લેશે. ફૂટબૉલ દુનિયાની સૌથી વધુ લોકપ્રિય રમત ગણાય છે અને વિશ્વ કપના દિવસોમાં દુનિયાભરનાં બાળકોથી માંડીને યુવાનો સુધીમાં ફૂટબૉલ જોવાનો અને રમવાનો બુખાર ચડે છે. તે થોડા મહિનાઓ પછી ભારત જેવા દેશમાં ઊતરી જાય છે. ભારતની શેરીઓમાં અને મેદાનોમાં હવે બાળકો રમતાં જોવા મળશે.