કચ્છનું ક્રાંતિતીર્થ ડિજિટલ બનશે

પ્રખર સ્વાતંત્ર્ય સેનાની પંડિત શ્યામજી કૃષ્ણ વર્માનું ભવ્ય સ્મારક માંડવી પાસેના મસ્કા ખાતે દરિયાકિનારે ઊભું કરાયું છે. ૨૦૧૧માં શરૂ થયેલા આ ક્રાંતિતીર્થની જાળવણી, દેખરેખ અને સંચાલનની જવાબદારી જીએમડીસીને સોંપવામાં આવી છે. થોડા સમય અગાઉ આ તીર્થની ઘોર ઉપેક્ષા થઈ રહી હોવાની ફરિયાદો ઊઠી હતી. હવે જાણે આ ફરિયાદોને દૂર કરવાના ભાગરૂપે ક્રાંતિતીર્થની કાયાપલટ કરવાનો નિર્ણય લેવાયો છે. અહીં ક્રાંતિવીરના જન્મ, બાળપણ, યુવાની, તેમનો સંસ્કૃતનો અભ્યાસ, વિદેશગમન, ત્યાંની પ્રવૃત્તિ, મૃત્યુ સુધીની તમામ મહત્ત્વની ઘટનાઓ આવરી લઈને દૃશ્ય-શ્રાવ્ય શૉ ઊભો કરાશે.

- સુચિતા બોઘાણી કનર

ભારત જ્યારે બ્રિટનની ધૂંસરી તળે પીસાતું હતું ત્યારે બ્રિટનની ધરતી પરથી જ તેમના વિરુદ્ધ અવાજ ઉઠાવીને વિનાયક દામોદર સાવરકર સહિત અનેક ક્રાંતિકારીઓને વિદેશની ધરતી પર મદદ કરીને સ્વાતંત્ર્ય સંગ્રામની ધૂણી ધખાવનારા ક્રાંતિગુરુ પંડિત શ્યામજી કૃષ્ણ વર્માનું નામ ભારતના ઇતિહાસમાં સુવર્ણ અક્ષરે લખાયેલું છે. તેમના અસ્થિ જીનિવાથી ભારત લવાયા બાદ કચ્છના માંડવી પાસેના મસ્કા ગામે દરિયાકિનારે ભવ્ય સ્મારક ઊભું કરાયું છે. આ સ્મારકમાં લંડનના ઇન્ડિયા હાઉસની પ્રતિકૃતિ, વિવિધ ગૅલેરીઓ, મ્યુઝિયમ, સ્મૃતિકક્ષ બનાવાયાં છે. આ સ્મારકની વધુ ને વધુ લોકો મુલાકાત લે, ક્રાંતિગુરુના પ્રદાનથી વાકેફ થાય તથા યુવા પેઢી તેમાંથી પ્રેરણા લે તે હેતુથી આ સ્મારકનું ડિજિટલાઇઝેશનનું કામ હાથ ધરાયું છે. જીએમડીસી સંચાલિત આ સ્મારક જ્યારે શરૂ થયું ત્યારે કચ્છ આવતા લોકોને આકર્ષતું હતું, પરંતુ વચ્ચેના સમયગાળામાં તે જાણે ઉપેક્ષાનો ભોગ બન્યું હોય તેમ અહીંનાં અનેક આકર્ષણો બિસ્માર થઈ ગયાં હતાં. હવે જ્યારે આ સ્મારકને આધુનિક સ્વરૂપ અપાઈ રહ્યું છે ત્યારે તે ભવિષ્યમાં ફરી વખત ઉપેક્ષાનો ભોગ ન બને તે જવાબદારો અને જાગૃતોએ જોવું રહ્યું.