આઈવીએફ દ્વારા કુંવારી માતાએ આપ્યો જોડિયાં બાળકોને જન્મ

દ્વાપર યુગમાં કુંવારી માતા કુંતીએ સામાજિક ડરને કારણે બાળક કર્ણનો ત્યાગ કરવો પડ્યો, પરંતુ સુરતમાં આ ૨૧મી સદીની નારીએ સમાજની પરવા કર્યા વિના નીડરતાથી કુંવારી માતા બનવાનો મક્કમ નિર્ણય લઈ જોડિયાં બાળકોને જન્મ આપ્યો.

- જિજ્ઞાસા સોલંકી

શસ્રો અનુસાર સ્ત્રી-પુરુષ એકબીજા વિના અધૂરાં છે. આ યુક્તિને હવે ૨૧મી સદીની માનુનીઓ પડકારી રહી છે. સ્ત્રી પુરુષ વિના પણ પૂર્ણતા પામી શકે છે આ વાતને સાબિત કરતો સુરતનો એક તાજો કિસ્સો છે. જેમાં ૪૨ વર્ષની મહિલાએ એડવાન્સ સાયન્સ ટૅક્નોલૉજી આઈવીએફ દ્વારા જોડિયાં બાળકોને જન્મ આપ્યો. તમે કહેશો આઈવીએફ દ્વારા જન્મ આપવો તો હવે સામાન્ય વાત થઈ ગઈ છે તો આમાં નવું શું છે? તો નવી વાત અહીં એ છે કે આ જોડિયાં બાળકોની માતા કુંવારી છે. આપણા ભારતીય સમાજમાં કુંવારી માતા બનવાનો નિર્ણય લેવો ખૂબ જ કઠિન છે, ત્યારે સુરતની ડિમ્પલ દેસાઈએ આ સાહસભર્યું પગલું લીધું છે.

એકલી માતા માટે આર્થિક સદ્ધરતા હોવી જ પર્યાપ્ત નથી, પરંતુ સામાજિક રીતે પણ ડગલે ને પગલે અનેક પડકારોનો સામનો કરવાની ક્ષમતા હોવી અનિવાર્ય છે. આવા બાળકને મોટું કરતી વખતે માતાએ કયા કયા પ્રશ્નોનો સામનો કરવો પડે એ કલ્પના માત્રથી ધ્રુજી જવાય છે. બાળકના ઉછેરમાં માતા-પિતા બંનેની હાજરી, હૂંફ અને પ્રેમ જરૂરી ગણાય છે, પરંતુ ડિમ્પલે પોતે માતાની સાથે પિતાની જવાબદારી પણ નિભાવવી પડશે એ પડકારને ઝીલવા મનને મક્કમ કરી લીધું. જ્યારે અભ્યાસ દરમિયાન અન્ય બાળકો સાથે પોતાનાં સંતાનોની સરખામણી અનાયાસે પણ થશે, આ સંતાનો બીજા બાળકોનો પિતા સાથેનો વ્યવહાર જોશે ત્યારે કેવી લાગણી અનુભવશે? એને કઈ રીતે સમજાવવા પડશે? આ તમામ બાબતો વિશે ડિમ્પલ કહે છે કે, ‘હમણાં તો મેં એવું કંઈ પણ વિચાર્યું નથી, પરંતુ ૨૧મી સદીના આ બાળકો છે. મને વિશ્વાસ છે કે આવી વાતો તેઓ સહેલાઈથી સમજી જશે. મને પોતાની જાત પર પણ વિશ્વાસ છે કે હું એમને આ બાબતે ખૂબ જ સારી રીતે સમજાવી શકીશ. આવા સમયે માતાની મક્કમતા જ બાળકોને એક ઉજ્જવળ ભવિષ્ય આપી શકે છે. આથી હું પૂરેપૂરી રીતે તૈયાર છું.’