મિસિસ વર્લ્ડમાં ચાલ્યો સરગમ કૌશલના સૌંદર્યનો જાદુ

આ વર્ષે ૧૫ જૂનના રોજ મુંબઈના ગોરેગાંવમાં આયોજિત મિસિસ ઇન્ડિયા સ્પર્ધામાં સરગમે અન્ય ૫૧ સ્પર્ધકોને પાછળ છોડીને મિસિસ ઇન્ડિયાનો તાજ પોતાના નામે કર્યો હતો

વર્ષ ૨૦૨૧માં સૌંદર્ય સ્પર્ધા મિસ યુનિવર્સનો ખિતાબ ભારતીય સુંદરી હરનાઝ સંધુના શિરે શોભાયમાન થયો હતો. ત્યાર બાદ ફરી એકવાર અન્ય એક ભારતીય શ્રીમતીએ સૌંદર્ય સ્પર્ધા મિસિસ વર્લ્ડનો ખિતાબ પોતાના નામે કરીને ભારતનું ગૌરવ વધાર્યું છે. આ સૌંદર્ય સ્પર્ધા જીતનારી સુંદરીનું નામ છે શ્રીમતી સરગમ કૌશલ. સરગમનું નામ જેટલું સુરીલું છે એટલું જ તેમનું સૌંદર્ય મોહક અને વ્યક્તિત્વ આકર્ષક છે અને આ વાતની સાબિતી આપી છે મિસિસ વર્લ્ડ સ્પર્ધાએ. વર્ષ ૨૦૨૨નો મિસિસ વર્લ્ડનો ખિતાબ ભારતની સુંદરી મિસિસ સરગમ કૌશલે જીત્યો છે.

૩૨ વર્ષીય સરગમ કૌશલનો જન્મ જમ્મુમાં થયો છે. તેમના પતિ આદિત્ય મનોહર શર્મા ભારતીય નૌસેનામાં અધિકારી છે. મુંબઈ સ્થળાંતરિત થયા પહેલાં સરગમ જમ્મુમાં અંગ્રેજી વિષયનાં શિક્ષિકા હતાં. વર્ષ ૨૦૦૧માં વ્યવસાયે ડૉક્ટર એવા અદિતિ ગોવિત્રીકરે મિસિસ વર્લ્ડ ખિતાબ જીતીને ભારતને ગૌરવ અપાવ્યું હતું. ૨૧ વર્ષ બાદ સરગમ કૌશલે ફરી એકવાર ભારતને આ સન્માન પ્રાપ્ત કરાવ્યું છે.

મિસિસ વર્લ્ડ સ્પર્ધાની શરૂઆત વર્ષ ૧૯૮૪માં થઈ હતી. અદિતિ ગોવિત્રીકરે પહેલીવાર વર્ષ ૨૦૦૧માં આ સ્પર્ધા જીતીને ભારતને ગૌરવ અપાવ્યું હતું. ૨૧ વર્ષ બાદ સરગમ કૌશલે અન્ય ૬૩ પ્રતિસ્પર્ધીઓને હરાવીને આ ખિતાબ પોતાના નામે કર્યો છે. વર્ષ ૨૦૨૧ના વિજેતા મિસિસ શાયલીન ફોર્ડએ સરગમને વિજેતાનો તાજ પહેરાવીને અભિવાદન કર્યું હતું.