કિરણ પટેલ જેવા મહાઠગનું મનોવૈજ્ઞાનિક વિશ્લેષણ

મિસ્ટર નટવરલાલની નવ કે દસ વખત ધરપકડ કરવામાં આવી હતી, પરંતુ તે દર વખતે ભાગી જવામાં સફળ રહ્યો હતો. તેની ભાગી છૂટવાની મોડસ ઓપરેન્ડી પણ બહુ જ રસપ્રદ હતી

- જયેશ શાહ

આ દુનિયામાં મિસ્ટર નટવરલાલની ખોટ નથી પડતી. સરેરાશ દર દસ વર્ષે એક મહાઠગ આવી જ જાય છે. ‘લોભિયા હોય ત્યાં ધૂતારા ભૂખે મરતા નથી.’ એ ઉક્તિને આવા મહાઠગ સાચી ઠેરવતા રહ્યા છે. આવા એકદમ ખાસ મહાઠગોની એક અલગ દુનિયા છે. પોતાને બહુ જ હોશિયાર અને કોઈનાથી છેતરાતા જ નથી એવું માનનારાઓ જ આવા મહાઠગનો જલ્દીથી શિકાર થઈ જતા હોય છે.

ભારતમાં મિસ્ટર નટવરલાલ તરીકે જાણીતા થયેલા મિથિલેશ શ્રીવાસ્તવ (જેના પર ‘મિસ્ટર નટવરલાલ’ ફિલ્મ બની), ચાર્લ્સ શોભરાજ (જેના પરથી ‘મૈં ઔર ચાર્લ્સ’ ફિલ્મ બની), મોહનસિંઘ (જેના પર ‘સ્પેશિયલ ૨૬' ફિલ્મ બની), સુકેશ ચંદ્રશેખર, સ્વામી નિત્યાનંદ – આ બહુ જાણીતા મહાઠગ છે. કિરણ પટેલ વિષે તો અખબારોમાં અને મીડિયામાં ઘણું આવી ગયું છે.

મિથિલેશ શ્રીવાસ્તવ ઉર્ફે મિસ્ટર નટવરલાલ

મિસ્ટર નટવરલાલ તરીકે જાણીતા થયેલા મિથિલેશ શ્રીવાસ્તવ જેવો મહાઠગ આજ સુધી થયો નથી. તેણે તાજમહેલને ત્રણ વખત વેચી દીધો હતો. રાષ્ટ્રપતિ ભવન, લાલ કિલ્લો અને સંસદ ભવનને પણ વેચી દીધું હતું. આ મહાઠગે ડઝનબંધ બનાવટી નામો ધારણ કરીને અનેકવિધ તરકીબો અજમાવીને સેંકડો વેપારીને શિકાર બનાવ્યા હતા. તેણે ટાટા, બિરલા અને ધીરુભાઈ અંબાણી સહિતના અનેક ઉદ્યોગપતિઓ સાથે કથિત રીતે છેતરપિંડી કરી હતી અને તેમની પાસેથી મોટી રકમ પડાવી હતી. મિસ્ટર નટવરલાલે સંસદ ભવન એક વિદેશીને ‘વેચ્યું’ હતું અને આ ખરીદીમાં સંસદસભ્યોને પણ સામેલ કર્યા હતા.

મિસ્ટર નટવરલાલની નવ કે દસ વખત ધરપકડ કરવામાં આવી હતી, પરંતુ તેમાંથી મોટા ભાગના વખત તે બહાર નીકળીને ભાગી જવામાં સફળ રહ્યો હતો. તેની ભાગી છૂટવાની મોડસ ઓપરેન્ડી પણ બહુ જ રસપ્રદ હતી. તે ખૂબ જ ચાલાક હતો. મિસ્ટર નટવરલાલ કાનપુર જેલમાંથી પોલીસ અધિકારીનો યુનિફોર્મ પહેરીને ભાગી ગયો હતો. જેલના ગાર્ડ્સને પૈસાથી ભરેલી સૂટકેસ સાથે લાંચ આપીને પછી આગળના દરવાજેથી બહાર નીકળ્યો તે સમયે ડ્યૂટી પર રહેલા ગાર્ડે સલામી પણ આપી હતી.