જ્યુબિલી: ભારતીય સિનેમાના સ્વર્ણયુગની ઉજવણી

આ સિરીઝમાં પાત્રો ઉપરાંત ઘટનાઓ અને પ્રવાહોને પણ ખૂબ સહજતાથી વણી લેવામાં આવ્યા છે. કથાની સાથે ટેક્નોલૉજીનો વિકાસ ક્રમ પણ આગળ વધે છે

- પ્રિયંકા જોષી

સો કરતાં પણ વધુ વર્ષથી સિનેમા આપણાં જીવનનો અભિન્ન હિસ્સો બનીને રહ્યું છે. વિશ્વની સૌથી પહેલી ફિલ્મ ૧૮૯૬માં રજૂ થઈ અને ભારતમાં ૧૮૯૭ અને અનુક્રમે ૧૯૧૨માં ફૂલ લેન્થ ફિલ્મ રજૂ થઈ. એટલે કહી શકાય કે ભારતીય સિનેમાનો ઇતિહાસ વિશ્વના સિનેમા ઇતિહાસ જેટલો જ જૂનો છે. સિનેમાના પડદે કલાકારો પાત્ર ભજવે છે અને એ તેમના પાત્ર થકી લોકોનાં હૃદયમાં એક ખાસ, કાયમી સ્થાન બનાવી લે છે. તે પાત્રો લોકોનાં જીવન પર મન-વચન અને આચરણ પર પણ એટલાં જ પ્રભાવક સાબિત થાય છે. એ તેમનાં સુખ-દુઃખ, મુશ્કેલીઓ અને સંતાપો સાથે જોડાઈ જાય છે. તેથી મનોરંજનનું આ માધ્યમ સૌથી વધારે અસરકારક માનવામાં આવ્યું છે.

આજે ભારતીય ફિલ્મ જગત ૧૨૫મા વર્ષના ઓવારે આવીને ઊભું છે. આ વર્ષો દરમિયાન તેનો સતત વિકાસ અને આધુનિકરણ થતું રહ્યું છે. સિનેમા તેના નવીનતમ સ્વરૂપ over-totop (ott) પર આજે ખૂબ ફૂલી ફાલી રહ્યું છે.

તાજેતરમાં, આ પ્રકારના જ પ્લૅટફૉર્મ એમેઝોન પ્રાઇમ વીડિયોઝ પર ‘જ્યુબિલી’ વેબ સિરીઝ રિલીઝ થઈ છે. આ સિરીઝ કોઈ પણ મનોરંજક સિરીઝ કરતાં વધારે મહત્ત્વ ધરાવે છે, કારણ કે તે ભારતીય ફિલ્મ ઇતિહાસનો, તેની વિકાસ યાત્રાનો પણ પરિચય કરાવે છે. ‘રાજા હરિશ્ચંદ્ર’ – પ્રથમ ભારતીય મૂક ફિલ્મ બની, પરંતુ એ પછી આવ્યો ટોકીઝનો જમાનો. આ સિરીઝ આપણને ૩૦ના દાયકાની બોલતી ફિલ્મોના પ્રારંભકાળની રોમાંચક સફરે લઈ જાય છે.

પ્રાઇમ વીડિયો પર ડિરેક્ટર વિક્રમાદિત્ય મોટવાણે અને રાયટર અતુલ સબરવાલની નવી વેબ સિરીઝ જ્યુબિલી તેના પ્લોટ, સેટ ડિઝાઇન, વર્ણન અને પ્રદર્શનની પ્રશંસા સાથે પ્રેક્ષકોને ખૂબ ગમી છે. આ સિરીઝનાં સબળાં પાસાંની વાત કરીએ તો કાસ્ટિંગને સોમાંથી સો આપવા પડે છે.

આ શૉનાં મુખ્ય પાત્રો પ્રોસેનજીત ચેટર્જી, અદિતિ રાવ હૈદરી, અપારશક્તિ ખુરાના, સિદ્ધાંત ગુપ્તા, વામિકા ગબ્બી અને નંદીશ સંધુએ ભજવ્યા છે. આ ઉપરાંત રામ કપૂર, અરુણ ગોવિલ, શ્વેતા બાસુએ પણ ખૂબ સરસ રીતે પોતાનાં પાત્રોને ન્યાય આપ્યો છે.