હું છું તારું પ્રતિબિંબ, મારું જીવન એનું પ્રમાણ છે મા તું મહાન છે, એ વાતથી ઇશ્વર પણ ક્યાં અજાણ છે

માતા સમય આવ્યે બાળકની ભૂલને ઢાંકે છે તો સમય આવ્યે તેની ભૂલોની સજા પણ આપે છે. જરુર પડ્યે પીઠ પસવારે છે તો સમય આવ્યે કાન આમળે છે

- હેતલ ભટ્ટ

દર વર્ષે મે મહિનાનો બીજો રવિવાર સમગ્ર દુનિયામાં માતૃત્વ દિવસ મધર્સ ડે તરીકે ઉજવવામાં આવે છે. આ દિવસ માતાઓને સમર્પિત છે. દરેક બાળક આજીવન માતા-પિતાનો ઋણી રહે છે પણ આ એ વિશિષ્ટ દિવસ છે જ્યારે બાળકોને પોતાની માતાનો આભાર વ્યક્ત કરવાની તક સાંપડે છે. જો આ વિશ્વમાં કોઇ નિઃસ્વાર્થ પ્રેમ કરનારી વ્યક્તિ હોય તો એ મા છે, જે કોઇપણ પ્રકારના ફાયદા-ગેરફાયદા, લાભહાનિ વિના પોતાના બાળકોને સતત પ્રેમ કરતી રહે છે. વહાલ વરસાવતી રહે છે. સ્નેહમાં ભીંજાવતી રહે છે. દરેક બાળકના જીવનમાં એની માતા સૌથી પહેલી મિત્ર, સૌથી પહેલી શિક્ષક હોય છે જે બાળકને બોલતા-ચાલતા શીખવાડે છે, દરેક પરિસ્થિતિમાં તેની પડખે રહે છે પછી એ ભલે ને પા પા પગલી ભરતું બાળક હોય કે પછી જીવનના મહત્ત્વના નિર્ણયો લેવાના હોય. સંતાન ગમે તેટલી મોટી હોય તે ક્યારેય પોતાની મા થી પોતાની સમસ્યાઓ છુપાવી નથી શકતી. બાળક જ્યારે મા ના ઉદરમાં હોય છે ત્યારે જ મા તેની હરકતોને સમજવા લાગે છે, તે જન્મે ત્યારથી લઇને બોલતા ન શીખ્યું હોય ત્યાં સુધી મા બાળકની દરેક ભાવના, જરુરિયાતો સમજતી હોય છે. એમ જ બાળક ગમે તેટલો મોટો થાય તેની દરેક ઇચ્છાઓ, વિચારો, જરુરિયાતો અને તકલીફો એ બોલે નહીં તો પણ મા સમજતી હોય છે. મા માત્ર મા નથી હોતી. જીવનભર એ પોતાના બાળકના જીવનમાં જુદી જુદી ભૂમિકાઓ ભજવતી જ રહે છે.

બાળકની પહેલી રાઝદાર હોય છે માતા