સફળતાનાં નવાં શિખરો સર કરતી રામદેવ બ્રાન્ડ

વર્ષ ૨૦૦૪ માં બ્લો ટેક્નોલોજીવાળા આકર્ષક જારમાં રામદેવ હીંગનું પ્રમોશન કરવામાં આવ્યું. આ હીંગ સમગ્ર કેટેગરીને વિકાસના માર્ગ પર મૂકનારી પ્રથમ બ્રાન્ડ બની

સક્સેસ મંત્ર

“એકધારી શ્રેષ્ઠ ગુણવત્તા અને શુદ્ધતા દ્વારા લાખો ગ્રાહકોના સ્વાદનો શોખ અને સંતોષ પ્રાપ્ત કરવાનું એક માત્ર ધ્યેય.”

   હસમુખ આર. પટેલ, ચેરમેન, રામદેવ ફૂડ પ્રોડક્ટસ પ્રા. લિ.

બ્રાન્ડ

કડી તાલુકાના મેડા-આદરજ ગામેથી પૂર્વજોની સ્મૃતિ જેવા ઘરનું વેચાણ કરી વ્યવસાય કરવા અમદાવાદ આવેલા રામભાઈ પટેલે વર્ષ ૧૯૬૫ માં રામદેવ મસાલા દળવાની ઘંટી નાખી હતી. ’૭૦ ના દાયકામાં માધુપુરા માર્કેટમાં મસાલાની સિઝન દરમિયાન મસાલા દળાવવા માટે મહિલાઓની લાઇન લાગતી હતી ત્યારે દળામણ પર અંગત ધ્યાન આપવા માટે તેઓ જાતે ઉભા રહેતા હતા. તેમના પુત્ર અને કંપનીના ચેરમેન શ્રી હસમુખ પટેલના વિઝન અને અનુભવને કારણે બજારમાં વિવિધ પ્રોડક્ટસ મૂકવામાં આવી. વર્ષ ૧૯૮૯ માં એગમાર્ક યુક્ત મરચું, હળદર અને ધાણાજીરૂ પોલી પાઉચમાં વેચવાનો પ્રારંભ કર્યો ત્યારે રામદેવનું નામ લોકજીભે રમતું થઈ ગયું હતું. વર્ષ ૨૦૦૪ માં બ્લો ટેક્નોલોજીવાળા આકર્ષક જારમાં રામદેવ હીંગનું પ્રમોશન કરવામાં આવ્યું. આ હીંગ સમગ્ર કેટેગરીને વિકાસના માર્ગ પર મૂકનારી પ્રથમ બ્રાન્ડ બની. આજે રામદેવની ૧૦૦ થી વધુ પ્રોડક્ટ કેટેગરીના ૨૫૦ થી વધુ પેક્સ મસાલાના નકશા પર ગુજરાતમાં અને દેશવિદેશમાં સન્માનનીય સ્થાન ધરાવે છે. હાલમાં રામદેવના ૧,૭૦૦ થી વધુ કર્મચારીઓ છે. ૫૮,૦૦૦ ચો.વારમાં ચાંગોદર ખાતે અને ૧,૫૨,૦૦૦ ચો.વારમાં ચિયાડા ખાતે એમ કુલ ૨,૧૦,૦૦૦ ચો. વારમાં મસાલા અને નમકીનનો પ્લાન્ટ અને ઓફિસનો વિસ્તાર કરાયો છે. ૧૫૦૦ થી વધુ ડીલર અને ૧,૩૫,૦૦૦ થી પણ વધુ રિટેઇલર્સ રામદેવ સાથે જોડાયેલા છે.