નીતિન ચંદ્રકાંત દેસાઈ: ..અને કલાકારે જાતે જ પોતાનો સેટ સંકેલી લીધો

પાછલા દિવસો ઇન્ડસ્ટ્રી માટે ખરાબ રહ્યા. ‘હમ દિલ દે ચૂકે સનમ’, ‘લગાન’, ‘દેવદાસ’ અને ‘સ્વદેશ' જેવી ફિલ્મોના ભવ્ય સેટ્સ બનાવનાર આર્ટ ડિરેક્ટર નીતિન ચંદ્રકાંત દેસાઈનું અપમૃત્યુ થયું. બાળપણથી પ્રકૃતિપ્રેમી એવા નીતિન દેસાઈએ ‘તમસ’ સિરિયલથી કામની શરૂઆત કરી હતી. નીતિન દેસાઈએ અદ્ભુત ફિલ્મો, સિરિયલો તથા ગેમ શૉઝના સેટ ડિઝાઇન કર્યા હતા. તેઓ તેમની જિંદગીના અંતને ડિઝાઇન કરી, અલવિદા કહી ગયા. 

- પાર્થ દવે

બાલિવૂડના જાણીતા આર્ટ ડિરેક્ટર, પ્રોડક્શન ડિઝાઇનર અને નિર્માતા નીતિન દેસાઈએ બીજી ઓગસ્ટે તેમના સ્ટુડિયો ‘ND સ્ટુડિયો’માં ગળેફાંસો ખાઈને આત્મહત્યા કરી લીધી. તેમણે ‘હમ દિલ દે ચૂકે સનમ’ (૧૯૯૯), ‘લગાન’ (૨૦૦૧), ‘દેવદાસ’ (૨૦૦૨), ‘સ્વદેશ' (૨૦૦૪), ‘લગે રહો મુન્નાભાઈ’ (૨૦૦૬), ‘જોધા અકબર’ (૨૦૦૮) અને ‘પાણીપત’ (૨૦૧૯) જેવી ફિલ્મોના ભવ્ય સેટ્સ ડિઝાઇન કર્યા હતા. મને બેસ્ટ આર્ટ ડિરેક્ટર તરીકે ૪ વખત નેશનલ એવોર્ડ મળ્યો હતો. તેમની આત્મહત્યા પાછળનું કારણ કરોડો રૂપિયાનું દેવું તથા મેડિકલ પ્રોબ્લેમ હોવાનું કહેવાઈ રહ્યું છે. નીતિન દેસાઈના પરિવારે એડલવાઇસ નામની કંપની ઉપર આરોપો મૂક્યા છે. પાંચ લોકો સામે કેસ દાખલ થયા છે. એક બાજુ, બોલિવૂડના કલાકાર કસબીઓ તેમને શ્રદ્ધાંજલિ અર્પી રહ્યા હતા, તો બીજી બાજુ કલાકારનું આ રીતનું મૃત્યુ ફિલ્મ ઇન્ડસ્ટ્રીની દશા પણ ક્યાંક છતી કરી રહ્યું હતું. સંજોગથી ૯મી ઓગસ્ટ (બુધવારે) નીતિન દેસાઈનો જન્મદિવસ છે. વિદાય પામેલા આ સર્જક-કલાકારની જીવન-ઝરમર જોઈએ.

બાળપણ

નીતિન ચંદ્રકાંત દેસાઈનો જન્મ ૯ ઓગસ્ટ, ૧૯૬૫ના રોજ મહારાષ્ટ્રના દાપોલીમાં થયો હતો. તેઓ મરાઠી ભાષી સ્કૂલ વામનરાવ મુરંજન હાઈસ્કૂલમાં ભણ્યા હતા. તેમણે એક ઇન્ટરવ્યૂમાં જણાવ્યું હતું કે, ‘બાળપણમાં ઉનાળાની રજા પડતાં જ કોંકણમાં આવેલા ગામ પચવાલી જતો રહેતો. ત્યાં વૃક્ષોની ડાળીઓ કાપતો, તેમાંથી ક્યારેક તલવાર બનાવતો તો ક્યારેક શિવાજી મહારાજના સૈનિકોની જેમ લડતો. મારા કલાકાર બનવામાં આ ગામનો ઘણો ફાળો છે.' નીતિન દેસાઈનાં માતા તથા ખેડૂત પિતાએ તેમનામાં કળા પ્રત્યેની રુચિ જોઈને આ ક્ષેત્રમાં જવાની મદદ કરી હતી.

ફિલ્મ ઇન્ડસ્ટ્રીની વાટ પકડી..