વિઝા વિમર્શ

ફીમાં વધારો

- ડો.સુધીર શાહ

અમેરિકા ખંડની ક્રિસ્ટોફર કોલંબસે ૧૪૯૨માં અનાયાસે ખોજ કરી અને સૌપ્રથમ યુરોપ અને ઇંગ્લેન્ડ અને ત્યાર બાદ ચીન અને જાપાન અને પછી તો વિશ્વના બધા જ દેશોના લોકોએ એ નવા ખોજાયેલા તક અને છતના દેશમાં પોતાનું નસીબ અજમાવવા ત્યાંની સુખ-સમૃદ્ધિમાં આળોટવા એ અફાટ દેશ તરફ દોટ મૂકી.

વર્ષો પછી ત્યાં જઈને વસેલા લોકોને એવું લાગવા માંડ્યું કે આમ ને આમ જો આખી દુનિયાના લોકો અહીં આવશે તો આ દેશની જમીન-જાયદાદ, સુખ-સાહેબીમાં તેઓ બધા ભાગ પડાવશે અને આજે જ્યાં મોકળી જમીનો છે ત્યાં ગીચ વસતિ થઈ જશે. આથી સ્થળાંતરનો જે કુદરતી નિયમ ‘પુશ એન્ડ પુલ’ છે એને અમેરિકામાં જઈને વસેલા લોકોએ વેગળો મૂક્યો અને ‘થિયરી ઓફ લેજિસ્લેટિવ રિસ્ટ્રેન્ટ’ અમલમાં આણી. કાયદાઓ ઘડીને અમેરિકામાં આવતા લોકોને અટકાવવા લાગ્યા.

સૌપ્રથમ એવું ઠરાવવામાં આવ્યું કે જે કોઈ પણ પરદેશી અમેરિકામાં પ્રવેશવા ચાહતો હોય તો એની પાસે ઓછામાં ઓછા પંદર ડૉલર હોવા જ જોઈએ. ત્યાર બાદ અમેરિકામાં પ્રવેશતા લોકો ઉપર હેડ ટૅક્સ જેને આપણે મુંડન વેરો કહીએ છીએ છીએ, એ લાદવામાં આવ્યો. તમારે અમેરિકામાં આવવું છે? તો પચાસ સેન્ટ મુંડન વેરા તરીકે અમેરિકાની સરકારને આપો. આ રકમ દિવસે-દિવસે વધતી ગઈ અને આજે પણ જો તમારે અમેરિકામાં પ્રવેશવું હોય, નોનઇમિગ્રન્ટ વિઝા મેળવીને ટૂંક સમય માટે ત્યાં જવું હોય અથવા તો ઇમિગ્રન્ટ વિઝા મેળવીને ત્યાં કાયમ રહેવા જવું હોય, તો તમારે વિઝા પ્રોસેસિંગ ફી આપવાની રહે છે.