એનાલિસિસ

ચૂંટણીના ચક્રવ્યૂહમાં ભાજપ આરંભથી જ અગ્રેસર

-  સુધીર એસ. રાવલ

આગામી લોકસભાની ચૂંટણીમાં વિજય પ્રાપ્ત કરવા માટે રાજકીય પક્ષો વચ્ચે કેવી તીવ્ર સ્પર્ધા છે, તે સમજવું જરા પણ કઠિન નથી. રાજકીય પક્ષો માટે અને રાજકીય નેતાઓ માટે ચૂંટણી ભલે બારેમાસનો વિષય હોય, પરંતુ સામાન્ય જનતા માટે તો ચૂંટણી પંચ જ્યારે ચૂંટણીની તારીખોનું એલાન કરે અને આચારસંહિતા લાગુ થાય, ત્યારથી જ તેને મન ‘ચૂંટણી આવી’ હોવાનો સ્પષ્ટ સંદેશ ગણાતો હોય છે.

આ વખતે ચૂંટણીની સત્તાવાર શરૂઆત ચૂંટણી પંચે નહીં, પરંતુ રાજકીય પક્ષોએ જ કરી દીધી છે એવું કહી શકાય, કારણ કે શરૂઆતમાં કેટલાક આમ આદમી પાર્ટી જેવા પ્રાદેશિક પક્ષોએ છૂટક-છૂટક ઉમેદવારો જાહેર કર્યા અને હવે ભારતીય જનતા પક્ષે પ્રથમ યાદીમાં જ એકસાથે ૧૯૫ ઉમેદવારો જાહેર કરી દઈને ચૂંટણીના ચક્રવ્યૂહમાં આરંભથી જ અગ્રેસર હોવાની છાપ પાડી છે. પ્રથમ યાદીમાં ગુજરાતની ૧૫ બેઠકો સહિત કુલ ૧૬ રાજ્યો અને બે કેન્દ્રશાસિત પ્રદેશને આવરી લેવાયા છે, જેમાં સૌપ્રથમ વારાણસી માટે વડાપ્રધાન નરેન્દ્ર મોદી અને ત્યાર બાદ લોકસભાના અધ્યક્ષ ઓમ પ્રકાશ બિરલા, કેન્દ્રીય મંત્રી અમિત શાહ અને રાજનાથસિંહ સહિત મોદી સરકારના અન્ય ૩૪ મંત્રીઓનાં નામ પણ પ્રથમ યાદીમાં જ જાહેર કરી દેવાયા છે. ઊડતી નજરે જોઈએ તો આ યાદીમાં શિવરાજસિંહ ચૌહાણ, અર્જુન મુંડા, સર્વાનંદ સોનોવાલ અને વિપ્લવ દેવ જેવા ચાર ભૂતપૂર્વ મુખ્યમંત્રીને કેન્દ્રમાં લઈ જવાની રણનીતિ અમલમાં મૂકાઈ છે. અનુસૂચિત જાતિ-૨૭, અનુસૂચિત જનજાતિ-૧૮, ઓબીસી-૫૭, યુવાવર્ગ કે જેઓની ઉંમર ૫૦ વર્ષથી ઓછી છે તેવા ૪૭ અને ૨૮ મહિલા ઉમેદવારોને પ્રથમ યાદીમાં ટિકિટ આપવામાં આવી છે.

રાજ્યોની યાદી પર નજર કરીએ તો મુખ્યત્વે ઉત્તર પ્રદેશમાં સૌથી વધારે ૫૧, ગુજરાતની ૨૬ બેઠકોમાંથી ૧૫, મધ્યપ્રદેશ-૨૪ અને પશ્ચિમ બંગાળમાં ૨૦ બેઠકો સામેલ છે. કેરળમાં મુસ્લિમ ઉમેદવાર અબ્દુલ સલામને ટિકિટ આપીને ભાજપે લઘુમતી સમુદાયને સાથે લેવાની કોશિશ કરી છે. ભાજપે ૨૦૧૪માં માત્ર ૭ અને ૨૦૧૯માં ૬ ઉમેદવારોને જ ચૂંટણીના મેદાનમાં ઉતાર્યા હતા.