બજેટઃ ઉમ્મીદ સે જ્યાદા મિલને કી આશા

૨૦૨૪ની સામાન્ય ચૂંટણી પહેલાંનું આ છેલ્લું પૂર્ણ અંદાજપત્ર હોવાથી લોકોની અપેક્ષા ઘણી છે. સરકાર એક તીરથી રાજકીય અને આર્થિક બન્ને લક્ષ્ય પાર પાડશે?

- જયેશ ચિતલિયા

નાણાપ્રધાન નિર્મલા સીતારમણઃ અપેક્ષાનો ભાર.

ભારતીય અર્થતંત્ર ઊભરતાં રાષ્ટ્રોમાં ભલે સૌથી ઝડપી વિકસતું અર્થતંત્ર ગણાય, ભારત સામે અનેક આર્થિક-સામાજિક પડકાર ઊભા છે. ભારતે ફાસ્ટેસ્ટ ઈકોનોમીના બિરુદથી છલકાઈ કે હરખાઈ જવાની જરૂર નથી. બેરોજગારી, આર્થિક અસમાનતા, ફિસ્કલ ડેફિસિટ (રાજકોષીય ખાધ), ટ્રેડ ડેફિસિટ, રૂપિયાની નબળાઈ, મોંઘવારી, વ્યાજદર, ગ્લોબલ સમસ્યા અને અનિશ્ચિતતા જેવાં પરિબળો આપણી સામે સવાલ બનીને ઊભાં જ છે.

શૈલેશ શેઠ

આ ઉપરાંત, દેશમાં અનેક પ્રકારના ચાલતા સામાજિક, રાજકીય અને ધાર્મિક વિવાદ પણ ભારત માટે પડકાર જ ગણાય. આ વર્ષ દરમિયાન આવનારી નવ રાજ્યોની વિધાનસભા ચૂંટણી અને ૨૦૨૪માં આવનારી સામાન્ય (લોકસભા) ચૂંટણી પણ સરકાર સામે અનેક પ્રશ્નો લઈને આવશે.

આવા સંજોગમાં ૨૦૨૩-૨૪નું કેન્દ્રીય બજેટ જાહેર થવામાં માત્ર ચાર દિવસ બાકી છે ત્યારે આ બજેટમાં ગરીબ જનતા, મધ્યમ વર્ગ, વેપાર-ઉદ્યોગ, વિવિધ બજારો, ફાઈનાન્સિયલ માર્કેટ માટે કેવાં પગલાં હશે, લોકોની શું અપેક્ષા-ધારણા છે, સંભવિત પગલાંઓની શું અસર થઈ શકે એને સમજવાનો પ્રયાસ કરીએ.

આવકવેરા સંબંધી ફેરફાર નિશ્ચિત

સૌપ્રથમ આવકવેરાની મુક્તિમર્યાદા વિશે એવી વ્યાપક ધારણા છે કે નાણાપ્રધાન આવકવેરાના માળખામાં એવા ફેરફાર કરશે કે જેનાથી મધ્યમ વર્ગને રાહતની લાગણી અનુભવાય. છેલ્લાં ત્રણેક વરસમાં કોરોનાના સંજોગોને પરિણામે નીચલા તેમ જ મધ્યમ વર્ગે ઘણું સહન કર્યું છે. એમને રાહત આપવામાં સરકારનું અર્થાત્ અર્થતંત્રનું પણ હિત છે. મુક્તિમર્યાદા વધારવાથી સરકારને આવકવેરાની રેવન્યૂમાં મોટો ફરક નહીં પડે, પરંતુ લોકોના હાથમાં નાણાં વધવાથી એ નાણાં બચત યા રોકાણ તરફ કે પછી ચીજવસ્તુઓની ખરીદી તરફ વળશે. ઈન શૉર્ટ, પ્રજાનાં બચેલાં નાણાં બજારમાં ફરતાં થશે.

સ્નેહલ મુઝુમદાર

સમાજના દરેક વર્ગ માટે નાણાપ્રધાન કંઈક ને કંઈક તો આપશે જ.