અનલિસ્ટેડ સ્ટૉક્સમાં રોકાણ કરવું છે? ...કરવું જોઈએ?

શું તમે જાણો છો, હવે અનલિસ્ટેડ સ્ટૉક્સમાં રોકાણનો ટ્રેન્ડ વધી રહ્યો છે... આવા સ્ટૉક્સમાં રોકાણ કરવાનાં કારણ અને રીત શું હોય છે? આ રોકાણ કરવું જોઈએ ખરું? ચાલો સમજીએ, અનલિસ્ટેડ સ્ટૉક્સની નાની માર્કેટને, જે ધીમે ધીમે મોટી થતી જાય છે.

- જયેશ ચિતલિયા

શું તમારે નૅશનલ સ્ટૉક એક્સચેન્જ (એનએસઈ)ના શૅર ખરીદવા છે? તમે કહેશો, અરે, એનએસઈના શૅર તો લિસ્ટેડ જ નથી. તો પછી કઈ રીતે ખરીદી શકાય? એનો આઈપીઓ આવવાની વાતો ચાલી રહી છે, પરંતુ અત્યારે કેવી રીતે ખરીદી શકાય? જવાબ છે, આઈપીઓ આવે ત્યારની વાત ત્યારે, તમારે અત્યારે એ શૅર ખરીદવા હોય તો સંભવ છે. વાત માત્ર એનએસઈની નથી, બલકે સંખ્યાબંધ અનલિસ્ટેડ કંપનીઓના સ્ટૉક્સના સોદાની પ્રવૃત્તિ વધી રહી છે.

ખાનગી ક્ષેત્રની અગ્રણી એવી એચડીએફસી બૅન્કની સબસિડિયરી એચડીબી ફાઈનાન્સિયલ સર્વિસીસના શૅર્સમાં પણ હાલ આ જ રીતે સોદા થઈ રહ્યા છે, જે અનલિસ્ટેડ છે. અલબત્ત, આ કંપનીનો આઈપીઓ લાવવાની તૈયારી થઈ રહી છે. અલબત્ત, આ ખેલ મોટે ભાગે મોટા રોકાણકારોનો ગણાય છે, પરંતુ હવે નાના-મધ્યમ કદના રોકાણકારો પણ એમાં રસ લેતાં થયા છે.

છેલ્લાં અમુક વરસથી કંપનીઓના અનલિસ્ટેડ સ્ટૉક્સમાં સોદા કરવાનું અને રોકાણનું પ્રમાણ વધતું રહ્યું છે. ભવિષ્યમાં આવી કંપની આઈપીઓ લાવશે એવા અહેવાલ ફરતા થવાની સાથે એ પહેલાં જ એનો લાભ લેવાની આશાએ આવાં રોકાણ થતાં હોય છે. આમ પણ જે-તે કંપનીના આઈપીઓમાં અરજી કર્યા બાદ શૅર મળશે કે કેમ એની ખાતરી હોતી નથી.

અનલિસ્ટેડ સ્ટૉક્સનો એક માર્ગ ‘ઈસોપ’