പ്രിയശിഷ്യൻ അതുല്യ ആചാര്യനുമൊത്ത്

സമാനതകളില്ലാത്ത പ്രകാശഗോപുരം

- ടി.പി. ശാസ്തമംഗലം

ശീർഷകത്തിൽ നിന്നുതന്നെ തുടങ്ങട്ടെ, എം.കൃഷ്ണൻ നായർ സിംഹത്തിന്റെ പേര്' എന്നാണ് തന്റെ പുസ്തകത്തിന് എസ്.ഭാസുരചന്ദ്രൻ കൊടുത്തിരിക്കുന്ന നാമധേയം. വിശദീകരണം ആവശ്യമില്ലാത്തവിധം സുവ്യക്ത മാണ് ഈ സംജ്ഞ. ഏറെ ആലോചിച്ച ശേഷം ഇട്ട അഭിധാനമാണ് ഇതെന്നു തീർച്ച. എന്തേ ഇങ്ങനെയൊരു പേരു നൽകാൻ

 ഉത്തരം ഗ്രന്ഥകാരൻ തന്നെ ആമുഖത്തിൽ കുറിച്ചിട്ടുണ്ട്. “മലയാള സാഹിത്യവിമർശനത്തിലെ ആദ്യത്തെയും അവസാനത്തെയും സമ്പൂർണ്ണ വയലൻസാണ് പ്രൊഫ.എം.കൃഷ്ണൻ നായർ. അപ്പോൾ സ്വപ്ലമൊന്നു മാറ്റിപ്പറഞ്ഞാൽ എം.കൃഷ്ണൻ നായർ വയലൻസിന്റെ പേര് എന്നാകും. വയലൻസിനും സിംഹത്തിനും തമ്മിൽ പ്രഗാഢമായ ബന്ധമുണ്ടല്ലോ. പോരെങ്കിൽ മൃഗരാജനുമാണ് സിംഹം. എല്ലാ അർത്ഥത്തിലും തലയെടുപ്പുള്ള മൃഗം. നിരൂപണരംഗത്തെ തലയെടുപ്പിനെ ദ്യോതിപ്പിക്കാൻ സിംഹത്തെക്കാൾ നല്ല കാല്പനിക പ്രയോഗമില്ല. അതിനാൽ സ്വന്തം പുസ്തകം കൊണ്ടു എം. കൃഷ്ണൻ നായരുടെ പ്രിയ ശിഷ്യൻ എന്ത് ഉദ്ദേശിച്ചുവോ അത് നിഷ്പ്രയാസം നേടിയെടുക്കാൻ പ്രസ്തുത തലക്കെട്ടിലൂടെ അദ്ദേഹത്തിനു കഴിഞ്ഞിരിക്കുന്നു. ജീവിതകാലം മുഴുവൻ ഏകാന്തത ശ്വസിക്കുകയും ഏകാന്തത തന്നെ നിശ്വസിക്കുകയും ചെയ്യുക എന്നതാണ് മൃഗരാജന്റെ ജാതകം. അതു സംഭവിച്ചു എം.കൃഷ്ണൻ നായരിലും. ദാരുണമായൊരു സത്യസന്ധതയുണ്ട് അതിൽ.'' എന്നും മറ്റൊരിടത്ത് പുസ്തകരചയിതാവ് കൂട്ടിച്ചേർത്തിരിക്കുന്നു.