ക്രിക്കറ്റ് പ്രതീക്ഷയിൽ കേരളത്തിന്റെ പെൺകൊടികൾ

കളിക്കളം

-  എൻ.എസ്. വിജയകുമാർ

വനിതകളുടെ ട്വന്റി 20 ക്രിക്കറ്റ് ലോകകപ്പിൽ രണ്ടുവട്ടം തങ്ങളെ ഫൈനലിൽ കൈവിട്ട വിജയം ഇത്തവണ സ്വന്തമാക്കിക്കൊണ്ട് ന്യൂസീലൻഡ് ടീം ചരിത്രം കുറിക്കുക തന്നെ ചെയ്തിരിക്കുന്നു. ദുബായ് അന്തരാഷ്ട്ര ക്രിക്കറ്റ് സ്റ്റേഡിയത്തിൽ ഒക്ടോബർ 20 ന് നടന്ന ലോകകപ്പിന്റെ കലാശക്കളിയിൽ ദക്ഷിണാഫ്രിക്കയെ 32 റൺസിന് തോൽപ്പിച്ചാണ് ന്യൂസീലൻഡ് വനിതകൾ കന്നി കിരീടത്തിൽ മുത്തമിട്ടത്. നീണ്ട മുപ്പത്തിയാറ് വർഷ ങ്ങൾക്കുശേഷം ന്യൂസീലൻഡിന്റെ പുരുഷ ക്രിക്കറ്റ് ടീം ബാംഗ്ളുരുവിൽ ലോകത്തിലെ ഒന്നാം റാങ്കുകാരായ ഇന്ത്യക്കെതിരെ ആധികാരിക വിജയം നേടിയ ദിവസം തന്നെ കിവി വനിതകളുടെ ചരിത്രനേട്ടം അവർക്ക് ഇരട്ടി മധുരമാണ് നൽകിയിരിക്കുന്നത്.

ബംഗ്ളാദേശിൽ നടക്കേണ്ടിയിരുന്ന ഐസിസി ട്വന്റി 20 ലോകകപ്പ് വേദി ദുബായിലേക്ക് മാറ്റുകയായിരുന്നു. ഒക്ടോബർ മൂന്നിന് മത്സരങ്ങൾ ആരംഭിക്കുമ്പോൾ ന്യൂസീലൻഡ് വനിത ടീമിന് ലോകകപ്പ് സാദ്ധ്യതകൾ ആരും കല്പിച്ചിരുന്നില്ല. ലോക റാങ്കിങ്ങിൽ ആദ്യ സ്ഥാനക്കാരായ ഓസ്ട്രേലിയ, ഇംഗ്ളണ്ട്, ഇന്ത്യ ടീമുകൾക്ക് പുറമെ കഴിഞ്ഞ തവണ ഫൈനലിൽ പരാജയപ്പെട്ട ദക്ഷിണാഫ്രിക്ക ടീമുകൾക്കൊക്കെയായിരുന്നു ഇത്തവണയും ലോകകപ്പിൽ അന്തിമ വിജയം പ്രതീക്ഷിച്ചിരുന്നത്. തുടർച്ചയായി പതിനൊന്നു മത്സരങ്ങളിൽ തോൽവി ഏറ്റുവാങ്ങിയ റിക്കാർഡുമായി ദുബായിലെത്തിയ ന്യൂസീലൻഡ് കരുത്തരായ ഇന്ത്യക്കെതിരെ ആദ്യ ഗ്രൂപ്പ് മത്സരത്തിലെ അൻപത്തിയെട്ട് റൺസിന്റെ വിജയത്തോ ടെയാണ് ലോകകപ്പിൽ ശ്രദ്ധിക്കപ്പെട്ടത്. ആറുതവണ ചാമ്പ്യന്മാരായ ഓസ്ട്രേലിയയോട് അറുപതു റൺസിന്റെ ദയനീയ തോൽവി ഏറ്റുവാങ്ങിയെങ്കിലും ശ്രീലങ്ക പാക്കിസ്ഥാൻ ടീമുകൾക്കെതിരെ വിജയത്തോടെയാണ് ന്യൂസിലൻഡ് സെമിഫൈനലിൽ എത്തിയത്. മുൻ ചാമ്പ്യന്മാരായ വെസ്റ്റ് ഇൻഡീസിനെതിരെ എട്ടുറൺസിന്റെ വിജയമാണ് സോഫി ഡിവിൻ നയിച്ച ന്യൂസിലൻഡിനെ ഫൈനിലെത്തിച്ചത്.