എത്രയും പ്രിയപ്പെട്ട നമ്പ്യാർ സാർ

സ്മരണ

-  ജീവകുമാർ ആർ.

കുന്നത്ത് പുതിയ വീട്ടിൽ പത്മനാഭൻ നമ്പ്യാർ എന്ന  കെ.പി.പി നമ്പ്യാർ സാറിനെ ആദ്യമായി കാണുന്നത് 1980 ൽ എന്റെ അനുജത്തിയുടെ വിവാഹത്തിനാണ്. എന്റെ വല്യച്ഛൻ എം.എൻ.ഗോവിന്ദൻ നായർ, നമ്പ്യാർ സാറിനെ എനിക്കും അനുജത്തിക്കും അമ്മയ്ക്കും പരിചയപ്പെടുത്തി. അദ്ദേഹം എന്നെ ഒരു ചെറിയ കവർ ഏൽപിച്ചു. പിന്നീട് തുറന്നു നോക്കിയപ്പോൾ 101 രൂപയും നമ്പ്യാർ സാറിന്റെ കെൽട്രോൺ വിസിറ്റിംഗ് കാർഡും. ബസ്റ്റ് വിഷസ് ഫ്രം സരോജ് ആൻഡ് കെ.പി.പി.നമ്പ്യാർ എന്ന് കാർഡിൽ എഴുതിയിരുന്നു.

രണ്ട് വർഷങ്ങൾക്കുശേഷം പിന്നീട് ഒരു ഞായറാഴ്ച എം.എൻ. വല്യച്ഛൻ സുഖമില്ലാതെ പട്ടത്ത് വിശ്രമിക്കുമ്പോൾ, അദ്ദേഹത്തെ കാണ നായി നമ്പ്യാർ മുണ്ടുടുത്ത്, സ്വയം കാർ ഓടിച്ചു വന്നു. എന്നോട് കുശലം ചോദിച്ചശേഷം സ്വന്തമായി ഒരു സ്റ്റാർട്ടപ്പ് തുടങ്ങിയാൽ കെൽട്രോണുമായി സഹകരിക്കാമെന്ന് പറഞ്ഞു. ബിസിനസ്സ് നടത്താൻ താത്പര്യമുണ്ടോയെന്ന് ചോദിച്ചു. അതിന് പറ്റിയ ആളല്ല ഞാൻ എന്ന് മനസ്സിലാക്കിയിരുന്ന എം.എൻ തൽക്കാലം ജോലി ചെയ്ത് ഒരു പരിചയം ഉണ്ടാകട്ടെ എന്ന് മറുപടി കൊടുത്തു. ഞങ്ങൾ രണ്ടുപേരും വല്യച്ഛനോട് യാത്ര പറഞ്ഞിറങ്ങുമ്പോൾ എന്നെ വീട്ടിൽ വിടാം എന്ന് നമ്പ്യാർ സാർ. ഞാൻ മെഡിക്കൽ കോളേജിൽ വർഗ്ഗീസ് വൈദ്യനെ കാണാൻ പോകുന്നെന്ന് പറഞ്ഞപ്പോൾ അദ്ദേഹവും കൂടി. ടി.വി.തോമസ് വഴി വൈദ്യനെ നല്ല പരിചയം ഉണ്ടെന്നും പറഞ്ഞു.