മ്യൂച്വൽ ഫണ്ട് നിക്ഷേപത്തിൽ കുത്തനെ ഇടിവ്

പ്രതിമാസ കണക്ക് താരതമ്യം ചെയ്യുകയാണെങ്കിൽ ടാക്സ് സേവിങ് ഫണ്ടുകളിലെ നിക്ഷേപത്തിൽ 61 ശതമാനമാണ് വർധന

മുംബൈ: കഴിഞ്ഞ മാസം അപേക്ഷിച്ച് മ്യൂച്വൽ ഫണ്ട് നിക്ഷേപത്തിൽ കുത്തനെ ഇടിവ്. 2.39 ലക്ഷം കോടി രൂപയായിരുന്നു ഒക്ടോബറിൽ നിക്ഷേപമായെത്തിയതെങ്കിൽ നവംബറിൽ 60,363 കോടിയിലൊതുങ്ങി. 75 ശതമാനമാണ് ഇടിവ്.

ഓഹരി അധിഷ്ഠിത മ്യൂച്വൽ ഫണ്ടുകളിലേയ്ക്കുള്ള നിക്ഷേപത്തിൽ 14 ശതമാനം കുറവാണ് രേഖപ്പെടുത്തിയത്. ഒക്ടോബറിൽ 41,886 കോടി രൂപയായിരുന്നു നിക്ഷേപമെങ്കിൽ നവംബറിൽ 35,943 കോടിയായി.

ഇക്വിറ്റി വിഭാഗത്തിലെ നിക്ഷേപ വരവിൽ സെക്ടറൽ തീമാറ്റിക് ഫണ്ടുകളിലാണ് കൂടുതൽ. നവംബറിൽ 7,657 കോടിയുടെ നിക്ഷേപം ഈ വിഭാഗങ്ങളിലെ ഫണ്ടുകളിലെത്തി. ഒക്ടോബറിലാകട്ടെ 12,278 കോടി രൂപയായിരുന്നു നിക്ഷേപമായെത്തിയത്.