શહેરમાં છરીની અણીએ લૂંટ કરતી ટોળકીનો આતંક: અઠવાડિયામાં ચાર વ્યક્તિ ભોગ બની

શહેરના શાહીબાગ, માધવપુરા, રામોલ અને સાબરમતી લૂંટ માટે ‘હોટ સ્પોટ'

અમદાવાદ, બુધવાર

શહેરમાં ગુનાખોરીએ ફરી માથું ઊંચક્યું હોય તેમ લૂંટની ઘટનાઓ સામે આવી રહી છે. શહેરમાં એકલદોકલ માણસોને છરી બતાવી લૂંટ કરતી ગેંગનો આતંક દિવસે ને દિવસે વધી રહ્યો છે. કેટલાક કિસ્સામાં નાગરિકો દ્વારા પ્રતિકાર કરવામાં આવતાં લૂંટારુઓ તેમના પર જીવલેણ હુમલા પણ કરે છે ત્યારે શહેરમાં એક અઠવાડિયામાં ચાર વ્યક્તિઓ લૂંટનો ભોગ બની છે.

શાહીબાગમાં રહેતા કીર્તન મુલચંદાણીએ પોલીસ સ્ટેશનમાં લૂંટની ફરિયાદ આપી છે કે તેઓ મોડી રાતે નોકરી પૂર્ણ કરીને તેમના ઘરે જઈ રહ્યા હતા. આ દરમિયાન તેઓ દધીચિબ્રિજ તરફથી પસાર થઇ રહ્યા હતા. તે સમયે તેમના મિત્રનો ફોન આવતાં તેઓ બાઈક સાઈડમાં કરીને વાત કરતા હતા.