മഞ്ഞുപെയ്യുന്ന - താഴ്വരയിലേക്ക്

കാടിന്റെ നിറഭേദങ്ങളും മഞ്ഞുമാണ് മഞ്ചൂരിന്റെ പ്രത്യേകത. ഒരിക്കൽ പോയാൽ പിന്നെയും പിന്നെയും ഈ തനിനാടൻ ഗ്രാമവും വഴികളും നമ്മെ വിളിച്ചുകൊണ്ടേയിരിക്കും

- DEEPA GANGESH

മുള്ളി-മഞ്ചൂർ പാതയിലെ യാത്രയുടെ സാഹസികതയെപ്പറ്റി എത്രയോ പറഞ്ഞുകേട്ടിരിക്കുന്നു. മാവോയിസ്റ്റ് ഭീഷണി നിലനിൽക്കുന്ന പ്രദേശം... പോവുന്ന വഴിയെല്ലാം ആനകളുടെയും കാട്ടു പോത്തുകളുടെയും വിഹാരകേന്ദ്രങ്ങളും. കേട്ടിട്ടുള്ള കഥകൾ പലതും പേടിപ്പിക്കുന്നതാണ്. പക്ഷേ, അതിനുമപ്പുറം ഈ യാത്ര   നൽകുന്നൊരു അനുഭൂതിയുണ്ട്. മലഞ്ചരിവിലൂടെ കുത്തനെ, നാല്പത്തിമൂന്ന് ഹെയർപിൻ വളവുകളും പിന്നിട്ടങ്ങനെ ഒരിക്കലും മറക്കാത്ത യാത്രയായിരിക്കുമതെന്ന് ഈ വഴിയിലൂടെ സഞ്ചരിച്ചവരെല്ലാം സമ്മതിക്കും. അപ്പോഴേ മനസ്സിൽ കുറിച്ചിട്ടതാണ് മുള്ളിയും മഞ്ചേരും. മുള്ളി ചെക്പോസ്റ്റ് അടച്ചതോടെ ആ ആഗ്രഹത്തിന് വിലങ്ങുവീണതാണ്. എന്നാൽ ആനക്കട്ടി വഴി ഇവിടെയെത്തി ചുരം കയറാൻ കഴിയുമെന്ന അറിവാണ് ഈ യാത്രയ്ക്ക് തുടക്കമായത്.

മൂന്നുവശവും മലകളാൽ ചുറ്റപ്പെട്ട ആനക്കട്ടിയിലെ താമസസ്ഥലത്തുനിന്ന് അതിമനോഹരമായ സൂര്യോദയവും കണ്ട് രാവിലെ യാത്ര തുടങ്ങി. കേരളത്തെയും തമിഴ്നാടിനെയും വേർതിരിച്ചു കൊണ്ടുള്ള, ആനക്കട്ടിയിലെ ചെറിയൊരു പാലം കടന്ന് മുന്നോട്ട് കോയമ്പത്തൂർ-കാര മട റോഡിലൂടെയാണ് പോവുന്നത്. പലയിടത്തും ആദിവാസിക്കുടികൾ കാണുന്നുണ്ട്. ആനശല്യം ഒഴിവാക്കാൻ ഊരുകൾക്ക് ചുറ്റും വൈദ്യുത വേലികൾ കെട്ടിയിരിക്കുന്നു.