തിരുവാലത്തൂരിലെ മഹാക്ഷേത്രത്തിൽ

നിളാതീരത്തെ ഐതിഹ്യപ്പെരുമനിറഞ്ഞ ക്ഷേത്രം. മഹിഷാസുരമർദിനിയും അന്നപൂർണേശ്വരിയും വാഴുന്ന രണ്ടുമൂർത്തി ക്ഷേത്രത്തിലെ പ്രദക്ഷിണവഴിയിലൂടെ

- ARUN P GOPI

നിളയുടെ കൈവഴിയായി ഒഴുകുന്ന പുഴയാണ്, ശോകനാശിനി; മനുഷ്യജീവിതത്തിലെ ശോകങ്ങളെ അകറ്റാൻ ശക്തിയുള്ള ദേവി മഹിഷാസുരമർദിനിയുടെ സാന്നിധ്യം കൊണ്ടാണ് ഈ പുഴയെ ശോകനാശിനിയെന്ന് വിളിച്ചുപോരുന്നത്. സമ്പന്നമായ ചരിത്രവും സംസ്കാരവും ഐതിഹ്യവും ഉറങ്ങുന്ന നിളയുടെ കൈവഴിയായ ശോകനാശിനിപ്പുഴയുടെ ഓരത്താണ് തിരുവാലത്തൂർ എന്ന കൊച്ചുഗ്രാമം. തിരുവാലത്തൂർ എന്ന പേരിനു പിന്നിലും ഒരു ഐതിഹ്യമുറങ്ങുന്നു. ഇവിടെ കുടികൊള്ളുന്ന ദേവിയുടെ ഇടതുഭാഗത്തു കൂടിയായിരുന്നു ശോകനാശിനി ഒഴുകിയിരുന്നത്. പിന്നീട് ദേവി, നദിയുടെ ഗതിമാറ്റി വലതുവശത്തുകൂടി ഒഴുക്കിവിട്ടത്. അങ്ങനെ ദേവിയുടെ വലതുവശത്തുകൂടി നദി ഒഴുകുന്ന പ്രദേശം തിരുവലത്താർ' എന്നറിയപ്പെട്ടു. കാലാന്തരത്തിൽ "ആറ്' എന്നത് "ഊര്' ആയി പരിണമിച്ചതാണ് തിരുവാലത്തൂർ. ഇവിടെയാണ് തിരുവാലത്തൂർ ശ്രീ രണ്ടുമൂർത്തി ഭഗവതി ക്ഷേത്രം സ്ഥിതിചെയ്യുന്നത്. ഉഗ്രമൂർത്തിയായ മഹിഷാസുരമർദിനിയും ശാന്തസ്വരൂപിണിയായ അന്ന പൂർണേശ്വരിയും ഇവിടെ കുടികൊള്ളുന്നു.