അന്നൊരുനാളിൽ അമ്മയുടെ നടയിൽ

മതവും വിശ്വാസവും എന്തുമായിക്കൊള്ളട്ടെ. ഇവിടെ, ഈ മൂകാംബികാസന്നിധിയിലെത്തുമ്പോൾ ചില തിരിച്ചറിവുകളുണ്ടാകുന്നു. മനുഷ്യനാണ്, സ്നേഹമാണ് വലുതെന്ന തിരിച്ചറിവ്

- P S SHAHIN

ഞാൻ ഭക്തനല്ല, ഒന്നുമല്ല. വിശേഷിച്ചൊരു "വ്യവസ്ഥാപിത വിശ്വാസി അല്ലെങ്കിലും കഴിഞ്ഞവർഷം ഒടുവിൽ കോവിഡ് പടർന്നിറങ്ങുന്ന, നവരാത്രി പൂജവെപ്പ് തിരക്കുകളൊന്നുമില്ലാത്ത നാളുകളിലൊന്നിൽ കൊല്ലൂർ മൂകാംബിക ക്ഷേത്രത്തിൽ പോകാൻ പ്രേരിപ്പിച്ചതെന്താണ് പലരും പറഞ്ഞുകേട്ട തുപോലെ ദേവി വിളിക്കുന്ന സമയമായതിനാലോ... കുറ്റങ്ങളെ പൊറുത്ത് നല്ല മനുഷ്യനാവാൻ ശക്തി തരൂ എന്ന ഏത് മതഗ്രന്ഥവും ചൊല്ലുന്ന പ്രാർഥനയാലോ.. വിഘ്നങ്ങളെക്കുറിച്ച് ആശങ്കകളുണ്ടായിരുന്നു. പകർച്ചവ്യാധിയുടെ നിയന്ത്രണങ്ങൾ, ആചാര-ആഘോഷങ്ങളൊന്നുമില്ലാത്ത ക്ഷേത്രകാലം, ബൈക്കപകടത്തിൽപ്പെട്ട് മൂന്നുമാസം കിടപ്പിലായവന്റെ ഒറ്റയ്ക്കുള്ള സഞ്ചാരം.

"ലക്കും ദീനുക്കും വലിയ ദീൻ' (നിനക്ക് നിന്റെ മതം, എനിക്ക് എന്റെ മതം) എന്ന ഖുർആൻ വചനം സാഹോദര്യത്തിന്റെ ധൈര്യം പകർന്നു. പുനത്തിൽ കുഞ്ഞബ്ദുള്ളയുടെ "ഞാൻ ശൂദ്രനാണ്' എന്ന വാക്കുകൾക്ക് അഡിഗയുടെ "അതിവിടെ പ്രസക്തമല്ല' എന്ന മറുവചനവും ഓർമയിൽ കൂട്ടായി. എല്ലാ പിറന്നാൾ ദിനത്തിലും യേശുദാസ് ഇവിടെ പാടാനെത്തുന്നതും യാത്രാ ഒരുക്കങ്ങൾക്ക് ആരോഹണമിട്ടു. കുടുംബം, ജോലി, ഇഷ്ടനേരമ്പോക്കുകൾ എന്നിവകളിൽ നിന്ന് മാറി ഞാനിതാ, ഒന്നുമോർത്ത് ധൃതിപ്പെടുകയോ വ്യാകുലപ്പെടുകയോ ചെയ്യേണ്ടതില്ലാത്തൊരിടത്തേക്ക്... എന്നെ ആട്ടുകയോ അനുഗ്രഹിക്കുകയോ ചെയ്യാം. യാത്രകൾക്ക് പറ്റിയതല്ല, പക്ഷേ, ഇതാണ് സമയം, അമ്മ വിളിച്ചിരിക്കുന്നു. എല്ലാം അമ്മ നേരത്തേ നിശ്ചയിച്ചതാണല്ലോ.