കാസിരംഗയിലെ ചോരവീണ മണ്ണിൽ

ഒറ്റക്കൊമ്പൻ കാണ്ടാമൃഗങ്ങളുടെ ചോരവീണ് കുതിർന്നതാണ് കാസിരംഗയിലെ മണ്ണ്. കൊമ്പറുത്തുമാറ്റുമ്പോൾ ചോരയും കണ്ണീരും തെറിക്കുന്ന മിണ്ടാപ്രാണികൾ. അറിയണം അവയുടെ തീരാവേദനയുടെ കഥ

- G. SHAHEED

രക്തം വാർന്ന തല സ്ക്രീനിൽ ക്ലോസ് അപ്പായി കാണാം. മണ്ണിൽ രക്തം തളം കെട്ടിക്കിടക്കുന്നു. പുൽക്കൊടികളിലും ചുവപ്പ്. ഞരക്കങ്ങൾ കേൾക്കാം. മരണത്തോട് മല്ലിട്ട് അന്ത്യനിമിഷങ്ങളെണ്ണിക്കഴിയുന്ന ആ സാധുജീവിയുടെ ദൃശ്യങ്ങൾ കാണുന്നവരെ അസ്വസ്ഥരാക്കുന്നു. കാട്ടുകള്ളന്മാരുടെ തോക്കിനിരയായ കാണ്ടാമൃഗത്തിന്റെ ദുരവസ്ഥയാണിത്. കാണ്ടാമൃഗവേട്ടയ്ക്കെതിരേ മൃഗസ്നേഹികളുടെ മനസ്സുണരാൻ ആഫ്രിക്കൻ വൈൽഡ് ലൈഫ് ഫൗണ്ടേഷൻ തയ്യാറാക്കിയ ഹ്രസ്വചിത്രങ്ങളിലൊന്നിലെ കാഴ്ചകളെക്കുറിച്ചാണ് മുകളിൽ പറഞ്ഞത്.

ദക്ഷിണാഫ്രിക്കയിലാണ് ലോകത്തിൽ ഏറ്റവും കൂടുതൽ കാണ്ടാമൃഗങ്ങൾ ഉള്ളത്. ഏറ്റവുമധികം വേട്ട നടക്കുന്നതും അവിടെത്തന്നെ. ഇന്ത്യയിലും കാണ്ടാമൃഗവേട്ട ഇപ്പോഴും തുടരുന്നു എന്നത് ദുഃഖസത്യമായി അവശേഷിക്കുന്നു. പ്രത്യേകിച്ച് കാസിരംഗപോലുള്ള സംരക്ഷിത കേന്ദ്രങ്ങളിൽ.

കൊമ്പിന്റെ വിപണി

കാണ്ടാമൃഗത്തിന്റെ കൊമ്പാണ് വേട്ടക്കാരുടെ പ്രധാനലക്ഷ്യം. വിദേശവി പണിയിൽ വൻ ഡിമാന്റാണ് ഇവയ്ക്ക് കണ്ടാമൃഗങ്ങളെ വേട്ടയാടുന്ന മാഫിയാസംഘത്തിന്റെ കണ്ണികൾ വിയറ്റ്നാമും ചൈനയും വരെ നീണ്ടുപോകുന്നു. ആഫ്രിക്കയിലെ മറ്റ് രാജ്യങ്ങളിലും കാണ്ടാമൃഗങ്ങൾ ഉണ്ട്. മുൻപ് നിർബാധം നടന്നിരുന്ന വേട്ട ഇപ്പോൾ ഒരളവുവരെ നിയന്ത്രിക്കാൻ സർക്കാരുകൾക്ക് കഴിഞ്ഞിട്ടുണ്ട്. അതിന് കാരണമുണ്ട്. കെനിയ, ടാൻസാനിയ പോലുള്ള രാജ്യങ്ങളുടെ സമ്പദ് വ്യവസ്ഥ നിലനിൽക്കുന്നത് വന്യജീവിടൂറിസം കൊണ്ടാണ്. അതിനാൽ വന്യജീവി സംരക്ഷണത്തിന്റെ വ്യാപ്തിയും ആഴവും വർധിപ്പിച്ചില്ലെങ്കിൽ രാഷ്ട്രങ്ങളുടെ സാമ്പത്തിക സ്ഥിതിയിൽ തകർച്ചയുണ്ടാകും. വന്യജീവി സംരക്ഷണത്തിന് വലിയ ശൃംഖലയാണ് ഈ രാജ്യങ്ങളിൽ പ്രവർത്തിക്കുന്നത്.

ഡേവിഡ് ആറ്റൻബറോയുടെ നിരവധി ഹ്രസ്വ ചിത്രങ്ങളും ആഫ്രിക്കൻ കാണ്ടാമൃഗങ്ങളുടെ സംരക്ഷണത്തിന് പ്രാമുഖ്യം നൽകിയിട്ടുണ്ട്. മനുഷ്യന് അപ്രാപ്യമായ പാപ്പുവ ന്യൂഗിനിയ ദ്വീപുകളിലെ പറുദീസാ പക്ഷികളെ അവതരിപ്പിച്ച് കാണികളെ കോരിത്തരിപ്പിച്ചപ്പോഴും, ആഫ്രിക്കയിൽ കാണ്ടാമൃഗങ്ങളുടെ വേട്ടയെ കേന്ദ്രീകരിച്ച് നിരവധി ചിത്രങ്ങൾ അദ്ദേഹം നിർമിച്ചു. പ്രകൃതി സ്നേഹികളുടെയും സാധാരണക്കാരുടെയും അവബോധത്തിന് പുതിയ തലം നൽകാൻ ഈ ചിത്രങ്ങൾ ഉപകരിച്ചിട്ടുണ്ട്.