കഥപറയുന്നൊരു നാട്

പച്ചപ്പിന്റെ അന്തമില്ലാക്കാഴ്ചകളും ഐതിഹ്യത്തിന്റെ കലവറകളും നിറഞ്ഞ ദേശം-കൊടുമൺ. കഥകളുടെ കൈപിടിച്ച് ആ ദേശത്തിന്റെ ഗ്രാമക്കാഴ്ചകളിലൂടെ...

- V PRAVEENA

മകരപ്പകൽ ഞൊറിഞ്ഞ വെയിൽപ്പുടവയ്ക്ക് നിലാക്കുടം കമഴ്ത്തിയ ചേല്. ജനുവരിയുടെ നേർത്ത ശീതക്കാറ്റിനുമുണ്ട് മകരമഞ്ഞിന്റെ കുളിര്. ആ കുളിരിന്റെ പുതപണിഞ്ഞ് മുന്നിലതാ അടൂർ പട്ടണം. നാലുഭാഗത്തേക്കും തുറന്നിട്ട വഴികൾ. അതിലൊന്ന് പത്തനംതിട്ടയിലേക്കുള്ളതാണ്. വഴിയുടെ ഇരുവശങ്ങളിലായി ആരാധനാലയങ്ങൾ. അയ്യനെ കാണാൻ പലദിക്കിൽ നിന്ന് വന്നെത്തിയവരുടെ വാഹനങ്ങൾ കടന്ന് മുന്നോട്ട്.

ആനന്ദപ്പള്ളി എത്തും മുൻപ് പന്നിവിഴയിൽനിന്ന് വലത്തേക്ക് ഒരു നാട്ടുവഴി. ജലപ്പച്ചയുടെ കുളിരുമായി സമൃദ്ധമായൊരു ജലാശയം മുന്നിൽ. പന്നിവിഴ, വലിയകുളം. ഒരു വേനലിലും വറ്റാത്ത ജലപ്പരപ്പ്. അതിന്റെ അരികിൽ പൂത്തുലഞ്ഞ മഞ്ഞവാക കാഴ്ചകളുടെ ആനന്ദലഹരി നുണഞ്ഞ് അവിടെ ഇത്തിരിനേരം.

പാതയോരത്തെ വെറ്റിലത്തടത്തിൽ വെള്ളം തേവുന്നുണ്ട് ഒരു ചേച്ചി. വഴി കൊടുമണ്ണിലേക്കുള്ളതാണെന്ന് അവർ പറഞ്ഞു. കൃഷിയൊഴിഞ്ഞ പാടങ്ങൾ. ചെളിക്കുത്തിൽ പുളയുന്ന പോത്തിൻ കൂട്ടം. അരികിലെ തോട്ടിൽ നീന്തിത്തുടിക്കുന്ന താറാപ്പറ്റം. കൺ മയക്കുന്നതെന്തോ കാത്തുകിടപ്പുണ്ട് മുന്നിലെന്ന സൂചന തന്നുകൊണ്ടിരുന്നു പ്രകൃതി.

ആ വഴി... ഈ വഴി...

പന്നിവിഴയിൽനിന്നുള്ള വഴി ചെന്നെത്തിയത് വീണ്ടുമൊരു കുളക്കരയിലാണ്. തോടിനോടുചേർന്ന് ഒരു കുഞ്ഞുകുളം. അതിന്റെ അരികുപറ്റി പാമ്പുടൽപോലെ വളഞ്ഞുപുളഞ്ഞ് കുത്തനെ കയറ്റം. കണ്ണെത്താദൂരത്തോളം പരന്നുകിടക്കുന്ന റബ്ബർ തോട്ടങ്ങൾ. കയറ്റത്തുനിന്നുള്ള കാഴ്ചയിൽ ഇല പൊഴിഞ്ഞ മരക്കാട് നരച്ച ഗർത്തംപോലെ ഭ്രമിപ്പിക്കുന്നു. മുന്നിലൊരു അമ്പലം. കൊടുമൺ, ഐക്കാട് ചുരക്കുന്ന് മലനട ക്ഷേത്രം. തളികകളിൽ അവലും മലരും പഴവും ഒക്കെയായി അമ്പല പടവിറങ്ങി വരുന്നുണ്ട് പൂജാരിയും പരികർമിയും.

ഇടവഴിയുടെ ഓരത്ത് കാട്ടു പൊന്തയ്ക്കുള്ളിൽനിന്ന് കർപ്പൂര ഗന്ധം ഉയരുന്നു. ഇലച്ചാർത്തിലെ കിളിക്കൂടുപോലെ മറ്റൊരു കുഞ്ഞു ക്ഷേത്രം അതിനുള്ളിലുണ്ട്. കാഴ്ചയിൽ പ്രശാന്തമായ പർണശാല പൂജയ്ക്കായി പൂജാരി കോവിലി ന്റെ കവാടം കടന്നു. കുറ്റിക്കാടി നിടയിൽ നിന്നൊരു കരിങ്കോഴി പാഞ്ഞുവന്നു. അമ്പലമണികൾ കിലുങ്ങി...കാട്ടുപൊന്ത വകഞ്ഞ് കലർപ്പില്ലാത്ത കാഴ്ചകളുടെ ജനാ ലകൾ തുറന്ന് മുന്നോട്ട്.