કમાતી સાસુ વહુ ઘરેલુ કેવી રીતે નિભાવશો

જ્યારે સાસુ કમાતા હોય અને વહુ ઘરેલુ હોય તો મોટાભાગે બંનેના અહમ્ વચ્ચે ટકરાવ થાય છે. આ સ્થિતિમાં કેટલીક વાતનું ધ્યાન રાખીને ઘરની શાંતિ જાળવી શકાય છે..

- 

કુમકુમ ભટનાગર ૫૫ વર્ષના છે, પરંતુ દેખાવે ૪૫થી વધારેના નથી લાગતા. તેઓ સરકારી કર્મચારી હોવાની સાથે ખૂબ ફિટ છે. તેઓ સ્ટાઈલિશ કપડાં પહેરે છે અને પૂરા આત્મવિશ્વાસ સાથે જીવે છે.

લગભગ ૨૫ વર્ષ પહેલાં પતિના કહેવા પર તેમણે સરકારી સ્કૂલના ટીચરના પદ માટે અરજી કરી હતી. તેઓ ગ્રેજ્યુએટ હતા અને તેમણે કમ્પ્યૂટર કોર્સ કર્યો હતો, આ કારણસર તેમને જલદી નોકરી મળી ગઈ. પછી કુમકુમ પૂરા ઉત્સાહ સાથે કામમાં લાગી ગયા હતા.

તે સમયે દીકરો નાનો હતો, પરંતુ સાસુ અને પતિના સહયોગથી બધા કામ સરળ થઈ ગયા હતા. સમયની સાથે તેમની નોકરીમાં પ્રગતિ થતી ગઈ.

આજે કુમકુમ પોતે એક સાસુ છે. તેમની વહુ પ્રિયાંશી ભણેલીગણેલી અને સમજદાર છોકરી છે. જોકે કુમકુમ પણ આવી જ વહુ ઈચ્છતા હતા. તેમણે જાણીજોઈને નોકરિયાત નહીં, પરંતુ ઘરેલુ છોકરીને પોતાની વહુ બનાવી હતી, કારણ કે તેમને ડર હતો કે જો સાસુવહુ બંને ઓફિસ જશે તો પછી ઘર કોણ સંભાળશે?

પ્રિયાંશી પણ ખૂબ મિલનસાર અને સુઘડ વહુ સાબિત થઈ હતી. તે ઘરના કામકાજ ખૂબ વ્યવસ્થિત રીતે કરતી હતી, પરંતુ પ્રિયાંશીના દિલમાં ક્યાંક ને ક્યાંક એક સણકો રહેતો હતો કે તેની સાસુ રોજ સજીધજીને ઓફિસ ચાલ્યા જાય છે અને તે ઘરની ચાર દીવાલ વચ્ચે કેદ રહે છે.

જોકે જોબ ન કરવાનો ઈરાદો તેનો શરૂથી રહ્યો હતો, પરંતુ હવે સાસુને જોઈને તેને હીનભાવના થઈ રહી હતી. કુમકુમ પોતાના રૂપિયા દિલ ખોલીને પોતાની પર ખર્ચ કરતા હતા. ક્યારેકક્યારેક વહુદીકરા માટે પણ થોડીક ભેટ લાવતા હતા. તેમ છતાં વહુને હંમેશાં પૈસા માટે પતિ સામે હાથ ફેલાવવો પડતો હતો. આ અસંતોષ ધીરેધીરે પ્રિયાંશીના મગજ પર હાવી થવા લાગ્યો. તેની સાહેલીઓ પણ તેને આ બાબતે ઉશ્કેરવા લાગી હતી.

પરિણામ એ આવ્યું કે પ્રિયાંશી ચીડિયલ થતી ગઈ. પછી સાસુની કોઈ પણ વાત પર તે ચિડાવા લાગી અને ઘરમાં ઝઘડા થવા લાગ્યા. એક હેપી ફેમિલી થોડા જ સમયમાં ફરિયાદી ફેમિલીમાં ફેરવાઈ ગયું.