துளியில் நிறைந்த கடல்!

இன்றைய உலகம் அறிவியல், தொழில்நுட்பம், நாகரிக வளர்ச்சி என்று எத்தனையோ முன்னேற்றங்களை சந்தித்து வந்தாலும், எல்லாவற்றிற்கும் அடிப்படை என்பது மனிதர்களாகிய நாம்தான். இத்தகைய முன்னேற்றங்களுக்கு இடையில், நமக்கு அதற்கேற்ற சவால்களும் புதிது புதிதாக உருவெடுத்து வருகின்றன. அதில் மிகப்பெரிய சவால் என்று பெரும்பான்மையானோர் கருதுவது இன்றைய குழந்தை வளர்ப்பு ஆகும்.

- வனிதா

"என்னுடைய மகள் அல்லது மகனை என்னால் புரிந்து கொள்ள முடியவில்லை. அவர்களின் உலகம் வேறாக இருக்கிறது. அவர்களுக்கு நாங்கள் சரியான வழிகாட்டுதலை தரவில்லையோ..?" என்ற சந்தேகம் பெரும்பான்மையான பெற்றோர்களுக்கு இருக்கிறது.

ஆதலால், அவர்களுக்கு வழிகாட்டும் விதமாகவும், இன்றைய குழந்தைகள் உலகம் எப்படியானதாக இருக்கிறது, அதில் பெற்றோர்களாகிய நாம் என்னவாக இருக்கிறோம், குழந்தைகள் மற்றும் மாணவர்களின் உலகத்தில் இந்த சமுதாயத்தின் பங்கு என்ன, அவர்கள் சந்திக்கும் சவால்கள், அதை தீர்ப்பதற்கான வழிமுறைகள் என்று ஒரு மிகப்பெரிய கருத்தாக்கத்தை அடிப்படையாகக் வழங்கலாம் என்று கொண்டு ஒரு நெடுந்தொடரை முடிவு செய்தோம்.

ஒரு சிறு விதையில்தான் மிகப்பெரிய ஆலமரம் அடங்கியுள்ளது. அதேபோன்று துளியாகத் தொடங்கும் நம் குழந்தைகளுடைய திறன்கள் பரந்து, விரிந்து மாபெரும் கடலாகப் பரிணமிக்க, பெற்றோர்களாகிய நாம் தான் தூண்டுதலாக இருக்க வேண்டும்.

அதன் அடிப்படையில், பத்து ஆண்டுகளுக்கும் மேலாக, குழந்தைகளுக்கான மனநல ஆலோசகராகவும், உளவியலாளராகவும் சிறப்பான முறையில் செயலாற்றி வரும் சென்னையைச் சேர்ந்த மனநல ஆலோசகர் வனிதா அவர்கள் எழுதும் இந்தத் தொடரை வெளியிடுவதில் பெருமிதம் கொள்கிறது தங்கமங்கை இதழ்.

வனிதா அவர்கள் தமிழ் இலக்கியம், உளவியல், கல்வி, ஆலோசனை மற்றும் வழிகாட்டுதல், நிர்வாக மேலாண்மை ஆகியவற்றில் முதுகலை பட்டப் படிப்பும் நிறைவு செய்துள்ளார். மேலும் ஆசிரியர் பட்டப்படிப்பும் நிறைவு செய்து கற்றலுக்கு எல்லையே இல்லை என்பதன் நிகழ் சான்றாக உள்ளார். தமிழ் இலக்கியத்தில் தங்கப் பதக்கம் பெற்றுள்ளார் என்பதும் குறிப்பிடத்தக்கது.

மேலும், இந்தத் துறையில் இவரது சிறப்பான சேவையைப் போற்றும் விதமாக பன்னாட்டு அரிமா சங்கம் வழங்கிய நல்லாசிரியர் விருது, கோல்டன் குரு விருது, உமன்ஸ் வுமன் விருது, தமிழ் சுரங்கம் விருது, இளம் சாதனையாளர் விருது உட்பட எண்ணற்ற விருதுகளை, பல்வேறு அமைப்புகள் வழங்கி பாராட்டியுள்ளன. இத்தகைய சிறப்பு வாய்ந்த வனிதா அவர்கள் எழுதும் இந்தத் தொடர், பெற்றோர்களுக்கு மட்டுமின்றி அனைத்து தரப்பினருக்குமே ஒரு வாழ்வியல் வழிகாட்டியாக இருக்கும் என நாங்கள் உறுதி அளிக்கின்றோம்.

"இன்றைய குழந்தைகளின் உலகம்'

பாகம் 1