புரிதல்களோடு வாழ்க்கை நடத்துவது எப்படி?

புரிதல் என்பது வாழ்க்கையை மிகவும் அர்த்தமுள்ளதாகவும், அழகானதாகவும் மாற்றி விடக் கூடியது. அதேநேரத்தில் புரிதல் இல்லாததால் தான் பிரிதல் அதிகம் நடக்கிறது என்பதையும் மறுப்பதற்கில்லை. புரிதலை பற்றி நாம் ஒவ்வொருவரும் என்ன புரிந்து கொண்டிருக்கிறோம்? இதன் வரையறை என்ன?

புரிதல் என்பது ஒருவரின் இயல்பினை அறிந்து அதற்கு இணக்கமான முறையில் நடந்து கொள்ளும் முறை.

ஒரு குடும்பத்தில் புரிதல் இல்லை என்றால் தம்பதிகள் வாழ்க்கை சிறக்காது. உண்மை காதல் இருந்தால் புரிதல் எளிதாகிறது.

பிள்ளைகள் குணமறிந்து பெற்றோர் அவர்களை வழி நடத்தும் விதம் புரிதலை தெளிவாக்குகிறது.

நட்பில் புரிதல் மற்றும் நம்பிக்கை இரண்டும் வேண்டும். நட்பில் புரிதல் இல்லை எனில் நண்பர்களிடையே இணக்கம் இருக்காது.

சமுதாய வாழ்க்கையில் புரிதல் இல்லை எனில் ஊருடன் ஒத்து வாழ்வது கடினம். மொத்தத்தில் வாழ்க்கையில் புரிதல் இல்லை எனில் உலக வாழ்க்கையுடன் இணங்கி வாழ்தல் கடினம்.

ஒருவரின் தெரிந்த குணங்களை வைத்து மட்டும் வைத்து புரிந்து கொள்ள முயற்சிக்கக் கூடாது. அவரிடம் நமக்கு தெரியாத குணங்களும் கட்டாயம் இருக்கும். அந்த குணங்கள் அவருக்கே உரிய சமூக, பொருளாதர பின்புலம் மூலம் உருவானதாக இருக்கும்.

தவிர, படித்த புத்தகங்கள், சந்தித்த மனிதர்கள் மற்றும் அவர்களால் பெற்ற அனுபவங்கள், அவர்களின் சுய சிந்தனை போன்றவற்றாலும், ஒருவரின் குணங்கள் கட்டமைக்கப் பட்டிருக்கும்.

ஒருவரின் குணங்கள் நாம் விரும்பியபடி இருக்க வேண்டியதில்லை. முற்றிலும் மாறாக இருக்கலாம். அந்த குணங்கள் சரி அல்லது தவறாக இருந்தாலும் ஒருவரை அப்படியே ஏற்று கொள்ளுதல் நட்பின் முதல்படியாகவும், காலம் செல்ல, செல்ல இருவருக்குமான உரையாடல்கள் மூலம் சரியானவற்றை தெரிந்து கொள்ளுதலுமே சரியான புரிதலாக இருக்ககூடும். இதுவே புரிதல் என்பதற்கான அரிச்சுவடி.

ஒருவரது உணர்வுகளை மற்றொருவர் அப்படியே ஏற்றுக்கொள்ளுதலே சிறந்த புரிதல் ஆகும்.

கணவர், மனைவி இருவரிடையே மட்டுமல்லாது எந்த உறவுமுறை எனினும் அவரவர் எண்ணங்களை தனியாக வெளிப்படுத்திட வழிவிடுதலே சிறந்தது.