எங்களுக்கும் சமூகப் பார்வை இருக்கிறது!

முத்துப்பேட்டையை சொந்த ஊராகக் கொண்ட தேவிலிங்கம் அவர்கள், தன் அப்பாவின் அரசாங்கப் பணி காரணமாக பல்வேறு ஊர்களில் வாழ்ந்துள்ளார். தற்போது திருமணத்திற்கு பிறகு வேதாரண்யத்தை வசிப்பிடமாக கொண்டுள்ள இவரின், மூன்றாவது புத்தகமான 'நெருப்பு ஓடு' நாவல், வெளியாகி உள்ளது. இதற்கு முன்னதாக இவரின் 'நெய்தல் நறுவீ என்ற கவிதை தொகுப்பும், 'கிளிச்சிறை’ என்ற சிறுகதை தொகுப்பும் வெளியாகி வாசகர் மத்தியில் பரவலான வரவேற்பை பெற்றுள்ளது. சீரோடிகிரி பதிப்பகம் நடத்திய போட்டியில் வெற்றி பெற்ற இந்த நாவலை, அந்த பதிப்பகமே வெளியிட்டுள்ளது.

எந்தவித வாசிப்பு பின்னணியும் இல்லாத, தற்போதைய குடும்பச் சூழலில் இருந்து கொண்டு, எழுதும் ஆர்வம் எப்படி ஏற்பட்டது?

எனக்கு கல்லூரி இரண்டாம் ஆண்டு படிக்கும் போதே திருமணம் முடிந்துவிட்டது. அதற்கு முன்புவரை புத்தகங்கள் என்பது என்னுடைய வாழ்க்கையில் பிரிக்க முடியாத ஒரு அங்கமாக இருந்தது. உணவைவிட புத்தகங்களைத் தான் நான் அதிகமாக நேசித்தேன். ஆனால், திருமணம் முடிந்த பிறகு, என்னுடைய மாமனார் புத்தகங்கள் படிக்கக் கூடாது என்று கூறிவிட்டார்.

தொழில் பின்னணி கொண்ட குடும்பத்திற்கு கல்வித்தகுதி அவ்வளவு முக்கியமானது இல்லை என்ற மனப்போக்கு அவரிடம் இருந்தது. அதனால், வீட்டு வேலை செய்வதும் குழந்தைகளையும், கணவரையும் பார்த்துக் கொள்வதும் தான் ஒரு குடும்ப பெண்ணிற்கான அடையாளமாக அவர்கள் கருதினார்கள்.

ஏறத்தாழ 20 ஆண்டுகள் புத்தகங்கள் என்பதையே வாசிக்காமல்தான் நான் இருந்தேன். எனக்கு கிடைக்காதது என் மகள்களுக்கு கிடைக்க வேண்டும் என்பதற்காக, அவர்களை கவிதை போட்டி, கட்டுரை போட்டி என்று பங்குபெற வைத்து அவர்கள் பரிசு வாங்குவதை பார்த்து மகிழ்ச்சி அடைவேன்.

இந்த சூழலில் என்னுடைய தம்பி, இத்தனை ஆண்டுகளுக்குப் பிறகும் நீ இப்படி இருப்பது தவறு என்று கூறி, எனக்கு நவீன செல்லிடபேசி வாங்கி கொடுத்து, அதில் முகநூல் கணக்கையும் தொடங்கிக் கொடுத்தார். அதில் ஒவ்வொன்றாக கற்றுக்கொண்டு முதலில் சிறிய அளவில் கவிதைகள் எழுதத் தொடங்கினேன்.

அப்போது எழுத்தாளர் கலாப்ரியா அவர்களின் பார்வையில் என்னுடைய கவிதைகள் பட, ஒருமுறை நான் கவிதையில் எழுத்து பிழை விட்டிருந்ததை அவர் திருத்தினார்.

அதன் தொடர்ச்சியாக நான் மதிக்கக் கூடிய பல்வேறு எழுத்தாளுமைகள் என் பதிவுகளை வாசித்து கருத்து கூற, என் எழுத்தின் மீதான நம்பிக்கை அதிகரித்தது. இன்னும் பொறுப்பாக எழுத வேண்டும் என்ற கூடுதல் அக்கறை ஏற்பட்டது. சமூக வலைதளங்களை பற்றி எத்தனை விமர்சனங்கள் இருந்தாலும், நான் முகநூலால் தான் வளர்ந்தேன்.