திறமையுள்ள எழுத்து நிச்சயம் அங்கீகாரம் பெறும்!

எழுத்தாளர் றின்னோஸா அவர்கள் டென்மார்க்கில் உள்ள ஒரு பன்னாட்டு தனியார் வங்கியில் உயர் அதிகாரியாக பொறுப்பில் உள்ளார். சிறுவயதில் இருந்தே தமிழின் மீதும், எழுத்தின் மீதும் மிகுந்த ஆர்வம் கொண்டவர். பல்வேறு இணையதள பத்திரிகைகளிலும், முன்னணி அச்சு இதழ்களிலும் இவருடைய படைப்புகள் வெளியாகி உள்ளன.

- றின்னோஸா

புவிசார் அரசியல், வரலாறு, சூழலிலியல் மற்றும் சமூகம் தொடர்பான கட்டுரைகள் என்று இவர் தனக்கென ஒரு தனித்த அடையாளத்தைக் கொண்டுள்ளார். இதுவரை 'உலகப் போர்களும், ஐரோப்பிய வரலாறும்', ‘யூரோடெக்', 'ஐரோப்பிய புராணங்களும் அசட்டுத்தனமான நம்பிக்கைகளும்' என்ற மூன்று புத்தகங்கள் வெளியாகி உள்ள நிலையில், இந்த ஆண்டு புத்தக கண்காட்சியை ஒட்டி ‘வதை முகாம்களின் சொல்லப்படாத வரலாறு! ஹிட்லர் யூதர்கள் மற்றும் யுத்தங்கள்' என்ற தொகுப்பு வெளிவந்துள்ளது.

உங்களுடைய 'வதை முகாம்களில் சொல்லப்படாத வரலாறுகள்' பற்றி சில வார்த்தைகள்?

இதற்கு முன்பு வெளியான மூன்று புத்தகங்களுமே விகடனில் தொடராக வந்து பெரும் வரவேற்பை பெற்ற

கட்டுரைகளின் தொகுப்புகள் ஆகும். ஆனால், இந்த 'வதை முகாம்களின் சொல்லப்படாத வரலாறுகள்! ஹிட்லர் யூதர்கள் யுத்தங்கள்’ படைப்பை, நேரடி புத்தகமாக கொண்டு வரவேண்டும் என்ற எண்ணத்தில், சுவாசம் பதிப்பகத்தின் மூலம் புதிய எழுத்தாக்கமாக வெளியிடுகிறோம்.

இந்த வரலாற்றைப் பற்றி எழுத வேண்டும் என்ற ஆர்வம் நீண்ட நாட்களாக எனக்குள் இருந்து வந்தது. எந்தவொரு நாணயத்திற்கும் இரண்டு பக்கங்கள் உண்டு என்று கூறுவார்கள். ஆகவே, நமக்கு தெரிந்த வரலாற்றிற்கு, தெரியாத பக்கங்களும் இருக்கும். பெரும்பான்மை வரலாறு என்பது யார் எழுதுகிறார்களோ, அவர்களுக்கு சாதகமாகத்தான் அமைகிறது.

ஹிட்லர் மாதிரியான எத்தனையோ கொடூரமான சர்வாதிகாரிகள் இந்த உலகத்தில் இருந்துள்ளனர். ஆனால், இன்றைக்கு வரையிலும் ஏன் இவர் மட்டும் அவ்வளவு கொடூரமான சர்வாதிகாரியாக அடையாளப் படுத்தப்படுகிறார் என்பதைப் பற்றிய ஒரு விரிவான அலசல் இந்த புத்தகத்தில் இடம் பெற்றிருக்கும்.

ஹிட்லரைப் பற்றி அதிகம் சொல்லப்படாத கதைகளை தேடிப் படித்தபோது, ஏன் அவருடைய ஒரு பக்கத்தை மட்டுமே இந்த உலகத்திற்கு காட்டுகிறார்கள் என்று கேள்வி எழுந்தது. அதேபோன்று இந்த கதையை மையமாக கொண்டு, தமிழில் அதிகமான புத்தகங்கள் வந்ததில்லை என்றதால், இந்த தமிழில் எழுத வேண்டும் என்ற விருப்பம் ஏற்பட்டது.