അർബുദം ലക്ഷണങ്ങളറിയാം

Vanitha

February 01, 2025

സൂചനകൾ തുടക്കത്തിലേ മനസ്സിലാക്കാം. അർബുദ ലക്ഷണങ്ങൾ തിരിച്ചറിയാം

- അമ്മു ജൊവാസ്

അർബുദം കണ്ടെത്താൻ വൈകുന്നതാണ് പലപ്പോഴും രോഗത്തിന്റെ സങ്കീർണത കൂട്ടുന്നത്.

ആരംഭഘട്ടത്തിലേ കാൻസർ ചില സൂചനകൾ തരും. ഓരോ കാൻസറിനും പ്രത്യേകമായ ലക്ഷണങ്ങൾ ഉണ്ട്. കൂടാതെ അർബുദങ്ങൾക്കു പൊതുവായുള്ള ലക്ഷണങ്ങളുമുണ്ട്.

പ്രത്യേകമായി പറയട്ടെ, ഇനി പറയുന്ന ലക്ഷണങ്ങൾ തീർച്ചയായും അർബുദലക്ഷണങ്ങളാണ് എന്നു ധരിക്കല്ലേ. ഇവയുണ്ടെന്നു കരുതി കാൻസറാണെന്ന് ഉറപ്പിക്കുകയും വേണ്ട. മറ്റു പല രോഗങ്ങളുടെ ലക്ഷണമായും ശരീരം ഇത്തരം സൂചനകൾ നൽകും.

നമ്മൾ ചെയ്യേണ്ടത് ശരീരം പറയുന്ന ഈ സൂചനകളെ തിരിച്ചറിഞ്ഞ് കാൻസർ അല്ല എന്നുറപ്പിക്കുകയാണ്. ഇതു നമുക്കു നാം നൽകുന്ന കരുതലാണ്.

കടുത്ത ക്ഷീണം

അർബുദമുള്ള 80 ശതമാനം പേർക്കും കടുത്ത ക്ഷീണം അനുഭവപ്പെടാം. ശരീരത്തിലുണ്ടാകുന്ന മാറ്റങ്ങളും ഊർജമില്ലായ്മയുമാകാം കാരണം. സാധാരണ ജീവിതത്തിൽ അനുഭവപ്പെടുന്ന ക്ഷീണമല്ല ഇത്.

ഇരിക്കുന്നിടത്തു നിന്ന് എഴുന്നേക്കാൻ പോലും പ്രയാസം വരാം. എപ്പോഴും കിടക്കാൻ തോന്നുക, ചെറിയ വിശ്രമം കൊണ്ട് ആശ്വാസം തോന്നുമെങ്കിലും ക്ഷീണം മാറാതെയിരിക്കുക, ദൈനംദിന കാര്യങ്ങൾ പോലും ചെയ്യാനാകാതെ വരിക എന്നിങ്ങനെ കടുത്ത ക്ഷീണമാകും അനുഭവപ്പെടുക.

ഉണങ്ങാത്ത മുറിവുകൾ, വ്രണങ്ങൾ

സ്തനാർബുദ ബാധിതരിലും തലയിലും കഴുത്തിലും കാൻസർ രോഗബാധ ഉള്ളവരിലും പൊതുവേ ഉണങ്ങാത്ത മുറിവുകളും വ്രണങ്ങളും കാണാം. രോഗം ശക്തി പ്രാപിക്കുന്നതനുസരിച്ചു ചെറിയ രക്തക്കുഴലുകളിൽ തടസ്സമുണ്ടാക്കി അവയെ അടച്ചു കളയുന്നു. തൽഫലമായി ആ ഭാഗത്തെ ചർമകോശങ്ങൾക്ക് ഓക്സിജൻ ലഭിക്കാതെ വരും. കോശങ്ങൾ നശിക്കും. ഇത് ഉണങ്ങാത്ത വ്രണങ്ങൾ രൂപപ്പെടാൻ കാരണമാകുന്നു.

നാവിലോ കവിളിലോ ചുണ്ടിലോ വൃണങ്ങൾ ഏറെ നാൾ ഉണങ്ങാതെ നിന്നാലും ശ്രദ്ധിക്കണം. നാവിന്റെ വശങ്ങളിൽ വരുന്ന മുറിവുകൾ പ്രത്യേകിച്ചും.