ഓൺലൈൻ പഠനം ആരോഗ്യകരമാക്കാം

പഠനം ഓൺലൈനിലായതോടെ കുട്ടികളുടെ പ്രശ്നങ്ങളെക്കുറിച്ച് പറയാനേ സമയമുള്ളൂ. “മൊബൈലിൽ നോക്കിയിരുന്ന് കഴുത്ത് വേദനിക്കുന്നു'' എന്നാണ് മിക്കവാറും കുട്ടികളുടെ പരാതി. കാഴ്ച്ച പ്രശ്നം മൂലം മകൾക്ക് കണ്ണട വയ്ക്കേണ്ടി വന്നതിനെക്കുറിച്ചാണ് മറ്റൊരു അമ്മയുടെ വേവലാതി. രാവിലെ തുടങ്ങുന്ന പഠനം പലപ്പോഴും ഏറെ വൈകിയാണ് അവസാനിക്കുന്നത്. ഇത് കുട്ടികളുടെ ആരോഗ്യത്തെ ബാധിക്കുന്നു. ഏറെ ഗൗരവത്തോടെ കാണേണ്ട സ്ഥിതിയാണ് ഇതെന്ന് ആരോഗ്യവിദഗ്ധരും സമ്മതിക്കുന്നു. കുട്ടികളുടെ ആരോഗ്യം സംരക്ഷിച്ചുകൊണ്ടുള്ള ഓൺലൈൻ പഠനത്തിലേക്ക് മാറുകയാണ് ഇനി വേണ്ടത്.

- പി.വി.സുരാജ്

കണ്ണിന്റെ ആരോഗ്യത്തിന്

സ്ക്രീനിൽ ഏറെനേരം നോക്കിയിരുന്നാൽ കണ്ണിന് വരൾച്ച, എരിച്ചിൽ, തലവേദന, കാഴ്ച മങ്ങൽ എന്നിവ വരാം. കൺപോള അടയ്ക്കാൻ മറക്കുന്നതു മൂലം ഈർപ്പം കുറയുന്നതാണ് കാരണം.

മേശക്ക് മുകളിൽ സ്റ്റാൻഡിൽ തലയ്ക്ക് നേരെ മൊബൈൽ ഉറപ്പിക്കണം. കണ്ണിൽ നിന്ന് ചുരുങ്ങിയത് ഒരു മീറ്ററെങ്കിലും അകലം വേണം.