അമ്മയെ ഓർക്കുമ്പോൾ

നിലാവെട്ടം

- ഗിരിജ വാര്യർ

അന്ന് ഉത്രാടമായിരുന്നു. 42 വർഷങ്ങൾക്ക് മുൻപ്. വറുക്കലിന്റെയും പൊരിയ്ക്കലിന്റെയും ഓണവിഭവങ്ങൾ ഒരുക്കുന്നതിന്റെയും ഒക്കെയായി ഒരു കൂട്ടപ്പൊരിച്ചിലിന്റെ ദിവസം... ശരിക്കും ഒരു ഉത്രാടപ്പാച്ചിലിന്റെ തത്രപ്പാടുകൾ. എല്ലാ മക്കൾക്കും കൂടി ഒരുമിച്ചു വരാൻ പറ്റാത്തതു കൊണ്ട് അറുപതാം പിറന്നാൾ ഓണക്കാലത്ത് ആഘോഷിക്കാമെന്ന് പദ്ധതിയിട്ടിരുന്നു അമ്മ. പക്ഷേ, ആ ഓണക്കാലത്തും ഞങ്ങൾക്ക് ആർക്കും എത്താൻ പറ്റാത്തതിന്റെ നിരാശയിലായിരുന്നു അമ്മ. എന്നാൽ ആ ഓണത്തിനുതന്നെ അമ്മ ഞങ്ങളെയെല്ലാം നാട്ടിലേക്കെത്തിച്ചു...

അന്ന്, നാട് മുഴുവൻ ഓണലഹരിയിൽ ആറാടുമ്പോൾ ഞങ്ങളുടെ വടക്കിനിയിൽ നിന്നു മാത്രം ഗദ്ഗദത്തിന്റെ അനുരണനങ്ങൾ ഉയർന്നുപൊങ്ങി. ഇപ്പോഴും ഇത്രയും വർഷങ്ങൾക്ക് ശേഷവും ഉത്രാടം ഒരു നൊമ്പരമായി ബാക്കി നിൽക്കുന്നു...