മോഡേൺ ബുള്ളറ്റ്

റോയൽ എൻഫീൽഡിന്റെ എക്കാലത്തെയും മികച്ച മോഡലുകളിലൊന്നായ ബുള്ളറ്റിന്റെ പരിഷ്കരിച്ച പതിപ്പ്

- നോബിൾ എം. മാത്യു

ഹൈവേകളിൽ, ഒൻപതു പതിറ്റാണ്ട്. കൃത്യമായി പറഞ്ഞാൽ തൊണ്ണൂറ്റിയൊന്നു വർഷമായി ബുള്ളറ്റ് എന്ന പേര് ലോക വാഹന വിപണിയിൽ മുഴങ്ങി കേൾക്കാൻ തുടങ്ങിയിട്ട്. നാട്ടുവഴികളിൽ, നെടുനീളൻ മഞ്ഞുറഞ്ഞ മലനിരകളിൽ, മരുഭൂമിയിൽ, സൈനിക മേഖലകളിൽ എന്നു വേണ്ട റോയൽ എൻഫീൽഡ് ബുള്ളറ്റിന്റെ ടയർ പാട് പതിയാത്ത ഇടങ്ങളില്ല. ലോകത്തിലെ ഏറ്റവു പഴക്കം ചെന്നതും ഇന്നും നിർമാണത്തിലുള്ളതുമായ മോഡലുകളിലൊ ന്നണ് ബുള്ളറ്റ്. 1932 ലാണ് ജിഎസ് 350 ബുള്ളറ്റ് നിരത്തിലെത്തുന്നത്. 350, 500 സിസി മോഡലുകളാണ് ബുള്ളറ്റ് എന്ന പേരിൽ നിരത്തിലി റങ്ങിയിട്ടുള്ളത്. ചരിത്രത്തിനൊപ്പം സഞ്ചരിച്ച ബുള്ളറ്റ് ഇതാ പരിഷ്കാരിയായി വന്നിരിക്കുകയാണ്. പുതിയ എൻജിനും പുതിയ രൂപവുമൊക്കെയായി. വിശദമായി ഒന്നു കാണാം..

ഡിസൈൻ

ഒരുകാലത്ത് കരുത്തിന്റെ പര്യായമായി കണ്ട വാഹനമാണ് ബുള്ളറ്റ്. കാഴ്ചയിലെ മസിൽ ലുക്കും അതോടിക്കുന്നവരുടെ മാസ് ലുക്കും ചേരുമ്പോൾ ബുള്ളറ്റിന്റെ പോക്കും വരവും ഒരു കാഴ്ച തന്നെയായിരുന്നു. കാലത്തിനൊത്ത മാറ്റത്തിൽ ബുള്ളറ്റിൽ നിന്ന് കിക്കർ ഒഴിവായിരിക്കുന്നു. റോയൽ എൻഫീൽഡിന്റെ മറ്റു മോഡലുകളിൽ നിന്നെല്ലാം കിക്കർ ഒഴിവാക്കിയിട്ടും ബുള്ളറ്റ് 350 ൽ അത് നിലനിർത്തിപ്പോരുകയായിരുന്നു. നൂതന ജെ സീരീസ് എൻജിനെത്തിയതോടെ കിക്കറും പഴങ്കഥയായി. സെൽഫ് സ്റ്റാർട്ടാണിപ്പോൾ. കാഴ്ചയിൽ മാസ് ലുക്ക് നിലനിർത്തിയിട്ടുണ്ട്. പുതിയ ക്ലാസിക് 350 യോടാണ് ബുള്ളറ്റ് 350 സാമ്യം ഏറെയും. ഭൂരിഭാഗം ഘടകങ്ങളും അതിൽ നി ന്നു കടംകൊണ്ടതെന്നു പറയാം.