ஓவர் ஈட்டிங் தவிர்ப்பது எப்படி?

இன்றைய சூழலில், பலரும் பலவித உடல் நலப் பிரச்னைகளை சந்திக்கின்றனர்.

- ஸ்ரீதேவிகுமரேசன்

இதற்கு பல்வேறு காரணங்கள் இருந்தாலும், உணவின் அளவை அதிகமாகச் சாப்பிடுவது ஒரு முக்கியக் காரணமாக இருக்கிறது. இது செரிமானப் பிரச்னை, உடல் பருமன், சர்க்கரை நோய், இதய நோய் போன்ற தீவிர நோய்களை உருவாக்கும் ஆபத்தும் உள்ளது. அதிகமாகச் சாப்பிடும் பழக்கத்தை மருத்துவ மொழியில் 'குறைபாடு' என்றே குறிப்பிடுகின்றனர். எனவே, உணவை சரியான அளவில் எடுத்துக் கொள்ள வேண்டியது அவசியமாகிறது. இது குறித்து உணவியல் நிபுணர் ஆர். புவனேஸ்வரி நம்முடன் பகிர்ந்து கொண்டவை:

அதிகம் சாப்பிடுவது (ஓவர்ஈட்டிங்) என்பது ஒரு குழந்தை அம்மாவின் வயிற்றில் இருக்கும்போதே தொடங்கிவிடுகிறது. அதாவது கர்ப்பகாலத்தில், பெண்கள் நன்றாக சாப்பிட வேண்டும், இரண்டு உயிருக்கும் சேர்த்து சாப்பிட வேண்டும் என்று சொல்லி சொல்லி அங்கேயே அதிக உணவை எடுத்துக்கொள்ள தூண்டப்படுகிறார்கள்.

அடுத்து, குழந்தைகள் வளரும் பருவத்தில் ஒல்லியாக இருந்தால், குழந்தையை நன்றாக ஊட்டி வளர்க்க வேண்டும் என்று அதிக உணவை திணிப்பது, அடுத்து அடுத்து மேல் தீணியை கொடுத்து கொண்டே இருப்பது போன்றவையாகும். அதுபோல் சிலர் மன அழுத்தத்தில் இருக்கும்போது, அவர்களுக்கு தெரியாமலேயே உணவை அதிகமாக எடுத்துக் கொள்வார்கள். இதனை எமோஷனல் ஈட்டிங் என்று சொல்கிறோம். இந்த எமோஷனல் ஈட்டிங் பழக்கம் லைப் ஸ்டைலை முற்றிலும் மாற்றுகிறது. இதனால் உடலில் மெட்டபாலிசம் டிஸ்ஆர்டர் உருவாகிறது. இதன் காரணமாக, உடல் பருமன், சர்க்கரை நோய், இதய நோய், வாயு பிரச்னை போன்றவற்றிற்கு காரணமாகிறது.

பொதுவாக நார்மலாக சாப்பிட வேண்டிய அளவைவிட அதிக அளவிலான உணவை உட்கொள்ளும்போது, அது இரண்டு வகையான பிரச்னைகளை உருவாக்கும். ஒன்று குறுகிய கால பிரச்னைகளை உருவாக்கலாம் அல்லது நாள்பட்ட பிரச்னைகளை உருவாக்கலாம்.