പിടിവാശികൾ മുറുകുന്നോ

അത്യന്തം വാശിയോടെ സ്വന്തം അന്യായങ്ങളിൽ ഉറച്ചുനിൽക്കുകയും അവയെ ആവേശപൂർവം ന്യായീകരിക്കുകയും ചെയ്യുമ്പോഴാണ് വാശി അനാരോഗ്യകരമായ മാനസികാവസ്ഥയായി മാറുന്നത്

- ഡോ.അദിതി എൻ. റിട്ട.അസോസിയേറ്റ്പ്രൊഫസർ മനഃശാസ്ത്രവിഭാഗം എം.ജി.കോളേജ്, തിരുവനന്തപുരം

നിരസിക്കപ്പെടുന്ന പ്രണയവും, തുടർന്നുള്ള പകയും പകവീട്ടലുകളും മനം നീറ്റുന്ന വാർത്തകളിൽ ഒന്നാണ്. പ്രണയം സ്വീകരിക്കാൻ വിസമ്മതം കാട്ടുന്നവരെ ജീവിക്കാൻ അനുവദിക്കില്ല എന്ന ദുശ്ശാഠ്യം. അതുപോലെ, പ്രണയിക്കുകയോ ഒന്നിച്ചു ജീവിക്കുകയോ ചെയ്യുന്ന കമിതാക്കളെ ഇല്ലായ്മ ചെയ്യാൻ പോലും മടിക്കാത്ത മാതാപിതാക്കളും സഹോദരരും വരെ, ഇന്ന് അപൂർവമല്ല. ദുർവാശി ഏതുവിധേനയും നടപ്പാക്കാൻ എന്തുമാർഗവും സ്വീകരിക്കാൻ മനുഷ്യന് മടിയില്ലാതാകുമ്പോൾ, ജീവിതം ദുരന്തമാകുന്നു.

എന്താണ് ശാഠ്യം

ഓരോ വ്യക്തിക്കും വ്യത്യസ്തമായ ചിന്തകളും പെരുമാറ്റ രീതികളും ഉണ്ട്, അത് പലപ്പോഴും അവരുടെ വ്യക്തിത്വത്തിന്റെ സവിശേഷതകളായി നിർവചിക്കപ്പെടുന്നു. അത്തരത്തിലുള്ള ഒരു സ്വഭാവമാണ് ശാഠ്യം. ഒരാളുടെ അഭിപ്രായമോ തീരുമാനമോ മാറ്റാനുള്ള മനസ്സില്ലായ്മയാണ് ഇത് അടയാളപ്പെടുത്തുന്നത്. അത്തരം ആളുകൾ പലപ്പോഴും സ്വന്തം വിശ്വാസങ്ങളോടും ആശയങ്ങളോടും അഭിപ്രായങ്ങളോടും കർശനമായ അനുസരണയുള്ളവരാണ്. അവർ മാറ്റങ്ങൾക്കെതിരേ ശക്തമായ പ്രതിരോധം തീർക്കുന്നു. മനസ്സ് മാറ്റാനുള്ള ശ്രമങ്ങളെ വ്യക്തിപരമായ ആക്രമണ ങ്ങളായി അവർ കാണുന്ന അവരുടെ ആശയങ്ങളെ ചോദ്യം ചെയ്യാൻ ശ്രമിക്കുന്ന ആരെയും ആഞ്ഞടിച്ച് അവർ എപ്പോഴും ജാഗ്രത പാലിക്കുന്നു. പുതിയ വിവരങ്ങൾ സ്വീകരിക്കുന്നതിനു പകരം, സ്വന്തം അഭിപ്രായങ്ങൾ വാദിച്ച് സമർഥിക്കാൻ മാത്രം അവർ ഇഷ്ടപ്പെടുന്നു. അടഞ്ഞ ചിന്താഗതിയും അരക്ഷിതാവസ്ഥയും, തങ്ങൾക്കനുയോജ്യമായ രീതിയിൽ മാത്രം വിവരങ്ങളെ വിശദീകരിക്കാനും വളച്ചൊടിക്കാനും അവരെ പ്രേരിപ്പിക്കുന്നു.