ഒരേതരം കാൻസർ ഓരോരുത്തരിലും വ്യത്യസ്തമാണോ

 കാൻസർ ഏത് ‘സ്റ്റേജിലാണ്' എന്ന് പ്രാധാന്യത്തോടെ പറയാറുണ്ട്. എന്നാൽ എത് ജീനിലാണ് കുഴപ്പം, ജനിതകമാറ്റം എന്തു സ്വഭാവമാണ് കാൻസർ കോശങ്ങളിൽ പ്രകടിപ്പിക്കുന്നത് എന്നിവയെല്ലാം വിലയിരുത്തിയാണ് ചികിത്സകൾ തീരുമാനിക്കുക

- ഡോ.നാരായണൻകുട്ടി വാരിയർ മെഡിക്കൽഡയറക്ടർ സീനിയർകൺസൾട്ടന്റ് മെഡിക്കൽഓങ്കോളജിവിഭാഗം എം.വി.ആർ കാൻസർ സെന്റർ റിസർച്ച് ഇൻസ്റ്റിറ്റ്യൂട്ട്, കോഴിക്കോട്

ഒരേ കാൻസർതന്നെ ഓരോരുത്തരിലും വ്യത്യസ്തമാണെങ്കിൽ അതിനനുസരിച്ച് ചികിത്സയിൽ മാറ്റം വരുത്തണോ?

ഒരേ കാൻസർ തന്നെ ഓരോരുത്തരിലും വ്യത്യസ്തമാണ്. ഉദാഹരണമായി ഒന്നാം സ്റ്റേജിലുള്ള സ്തനാർബുദം 90 ശതമാനത്തിലധികം ചികിത്സിച്ച് ഭേദമാക്കാനാകും. ഓപ്പറേഷനും കീമോതെറാപ്പിയും റേഡിയേഷനും ചെയ്താൽ ഭേദമാകുമെന്നാ പറയാറ്. എന്നാൽ അതേയാൾക്ക് ഒരു വർഷത്തിനു ശേഷം വീണ്ടും കാൻസറുണ്ടാകുന്നുവെന്ന് കരുതുക. സ്വാഭാവികമായും അവർ ചോദിക്കും. പൂർണമായും ഭേദമാകുമെന്നു പറഞ്ഞിട്ട് എന്തുകൊണ്ടാണ് ഇങ്ങനെയുണ്ടായതെന്ന്. വീടിനടുത്ത് മറ്റൊരു സ്ത്രീയുണ്ട്. അവർക്ക് പത്തുവർഷത്തിലേറെയായി അസുഖം വന്നിട്ട്. നാലാമത്തെ സ്റ്റേജിലായിരുന്നു കണ്ടെത്തിയത്. ശ്വാസകോശത്തെയും എല്ലിനെയും ബാധിച്ചിരുന്നു. ഒന്നും ചെയ്യാൻ കഴിയില്ലെന്നു പറഞ്ഞ് ഹോർമോൺ ഗുളിക മാത്രമാണ് നൽകിയത്. ഒന്നാം സ്റ്റേജിലുള്ള സ്തനാർബുദം മാറുമെന്ന് വിചാരിച്ചവർക്ക് തിരിച്ചുവരുന്നു. നാലാമത്തെ സ്റ്റേജിലെത്തിയവർ 10 വർഷത്തിലധികമായി കുഴപ്പമൊന്നുമില്ലാതെ ജീവിതം നയിക്കുന്നു. ഇത് എന്തുകൊണ്ടാണ്? ഇതിന്റെ അന്വേഷണം എത്തിച്ചത് പേഴ്സണലൈസ്ഡ് മെഡിസിൻ അഥവാ പ്രിസിഷൻ മെഡിസിൻ എന്ന രീതിയിലേക്കാണ്. കാൻസർ തന്മാത്രാതലത്തിൽ വ്യത്യസ്തമാണ്. അപ്പോൾ കാൻസർ ഒന്നാമത്തെ സ്റ്റേജിലാണോ നാലാമത്തെ സ്റ്റേജിലാണോ എന്നതുമാത്രമല്ല കാര്യം. ചിലപ്പോൾ ഒന്നാമത്തെ സ്റ്റേജിലുള്ള കാൻസറിന് നാലാമത്തെ സ്റ്റേജിലെ കാൻസറിനെക്കാൾ ശക്തിയുണ്ടാകും. ഇത് ജീൻ സ്റ്റഡിയിലൂടെ മനസ്സിലാക്കാനാകും.

മുകളിൽ പറഞ്ഞ ഉദാഹരണത്തിലെ നാലാമത്തെ സ്റ്റേജിലുള്ള അവർക്ക്  ഹോർമോൺ റിസപ്റ്റർ പോസിറ്റീവാണ്. അതുകൊണ്ട് ഹോർമോണുകൾ വഴിയാണ് കാൻസർ വളരുന്നത്. ട്യൂമർ സെല്ലുകൾക്ക് വളരാനാവശ്യമായ ഹോർമോൺ ഒഴിവാക്കിയാൽത്തന്നെ അതിനെ നിയന്ത്രിക്കാം.

രോഗത്തിന്റെ സ്റ്റേജിനു പുറമേ എത് ജീനിലാണ് കുഴപ്പം വന്നിരിക്കുന്നത്, എന ജനിതകമാറ്റമാണ് വന്നിരിക്കുന്നത്. ആ ജനിതകമാറ്റം എന്തുതരത്തിലുള്ള സ്വഭാവമണ് കാൻസർ കോശങ്ങളിൽ പ്രകടിപ്പിക്കുക എന്നിവയെല്ലാ വിലയിരുത്തി ഏതുതരത്തിലുള്ള ചികിത്സയാണ് വേണ്ടതെന്ന് തീരുമാനിച്ചാൽ ഈ കാൻസറിനെ നിയന്ത്രിക്കാൻ പറ്റും.