பொன்னியின் செல்வன்

எழுபது ஆண்டுகளுக்கு முன்பு கற்பனை கலந்து 'எழுதப்பட்ட ஒரு வரலாற்று (!) புதினம், இன்றளவும் தமிழ் புத்தக விற்பனையில் முன்னணியில் உள்ளது என்பதே ஆச்சரியத்திற்குரிய ஒன்றுதான்.

- ரம்யா ரவிக்குமார்

ஆண்டுதோறும் 1,00,000 பிரதிகள் வரை விற்பனையாகும் அந்த புத்தகத்தை, திரைப்படமாக எடுக்க பல திரை ஆளுமைகள் கனவு கண்டு அது நடக்காமல் போன நிலையில், இயக்குநர் 'மணிரத்னம்' அதை சாத்தியமாக்கியிருக்கிறார். கல்கி, எழுதிய 'பொன்னியின் செல்வனின்' திரையாக்கம், உண்மையில் எப்படி இருக்கிறது? பார்வையாளர்களின் எதிர்பார்ப்பை பூர்த்தி செய்திருக்கிறதா? என்பதை முதலில் பார்ப்போம்.

பிற சமூக மன்னர்களின் வரலாற்று மொழி மாற்று கதைகளையே, அதிகம் பார்த்து வந்த தமிழ் திரை உலகில், நானூறு ஆண்டுகளுக்கு மேலாகத் தமிழகத்தை ஆண்ட பிற்காலச் சோழர்களின் வாழ்க்கையைத் தழுவிய கதை என்பதே, பெருவாரியான மக்களின் மனதில் உள்ளக் கிளர்ச்சியை ஏற்படுத்த போதுமானதாக இருந்தது. நம் மண்ணின் மைந்தர்கள் என்ற உணர்வு அவர்களை ஆட்கொண்டு, திரைப்பட வெளியீட்டை ஆவலுடன் எதிர் நோக்கத் தொடங்கியதுடன், திரைப்படம் வெளியான முதல் நாளிலிருந்தே, மிகப்பெரிய வரவேற்பை தரவும் தொடங்கினர். அந்த எதிர்பார்ப்பை மணிரத்னம் அவர்களின் 'பொன்னியின் செல்வன்' பூர்த்தி செய்திருக்கிறதா என்று கேட்டால், வெளிப்படையான பதிலாக 'ஓரளவிற்கு' என்று கூறலாம். ஏனென்றால் புத்தகம் படித்த, ஏற்கனவே கதையை முழுதாக அறிந்தவர்களுக்கு ஒரு மாதிரியாகவும், புத்தகத்தை படிக்காத மறு சாராருக்கு ஒரு மாதிரியாகவும் கலவையான உணர்வை ஏற்படுத்தி இருக்கிறது திரைப்படம்.

புத்தகத்தை வாசித்தபோது, தங்களுடைய கற்பனையில் உதித்த கதாபாத்திரங்கள், திரையில் உயிருடன் உலவும் பொழுது, சில கதாபாத்திரங்கள் தங்கள் நடிப்பால் ஈர்த்தும், சில கதாபாத்திரங்கள் ஏமாற்றத்தை தந்திருப்பதும் உண்மைதான். புத்தகத்தில் உள்ளதை அதிகமாக சிதைக்காமல், ஆங்காங்கு நடக்கும் நிகழ்வுகளை, கூடுதலாக சில சண்டை காட்சிகளுடன் அப்படியே கோர்வையாக கொடுத்திருப்பதாலும், கதாபாத்திரங்கள் தேர்வு, சிறப்பான ஒளிப்பதிவு, இசை மற்றும் முடிந்தவரை பிரமாண்டமான காட்சியமைப்பு ஆகியவற்றின் காரணமாக, முன்பே கூறியது போன்று, படம் ரசிகர்களின் எதிர்பார்ப்பை ஓரளவிற்கு பூர்த்தி செய்திருக்கிறது.