പൊൻവെയിലുണ്ണും പൂമ്പാറ്റ

തുമ്പി, പൂമ്പാറ്റ, തേൻകുപ്പി ഇങ്ങനെ പൂന്തോട്ടത്തിന് അഴകു പകരുന്ന രൂപങ്ങളാണ് പുതിയ ഗാർഡൻ സോളർ വിളക്കുകൾക്ക്

വീടിനകത്തെ പ്രകാശം പോലെത്തന്നെ പ്രധാനമാണ് പുറത്തെയും. രാത്രി പുറത്തിറങ്ങേണ്ടി വരുമ്പോൾ കാഴ്ച വ്യക്തമാക്കുന്നതു മാത്രമല്ല, അഴക് പൊലിപ്പിക്കുന്നതുമായ വെളിച്ചമാകണം പൂന്തോട്ടത്തിലേത്. മൃദുവായി പരന്നൊഴുകുന്ന വെളിച്ചമാണ് പൂന്തോട്ടത്തിലേക്കു യോജിക്കുക.

സോളർ ലാംപുകൾ വീടിനു പുറത്തെ ആവശ്യങ്ങൾക്ക് വളരെ അനുയോജ്യമാണ്. പ്രകാശം പരത്തുന്ന സോളർ വിളക്കുകൾ വിപണിയിൽ ധാരാളമുണ്ട്. കൂടാതെ, പൂന്തോട്ടത്തിന്റെ ഭംഗി വർധിപ്പിക്കുക എന്ന കർത്തവ്യം കൂടി ഇപ്പോൾ പല സോളർ ഗാർഡൻ ലാംപുകളും ചെയ്യുന്നുണ്ട്. ചെറുകിളികൾ, പൂമ്പാറ്റ, തേനീ ച്ച, തുമ്പി, പൂങ്കുലകൾ തുടങ്ങി പൂന്തോട്ടത്തിലെ പതിവുകാഴ്ചകളെല്ലാം പുതിയ ഗാർഡൻ വിളക്കുകളുടെ രൂപത്തിൽ വിപണിയിൽ എത്തുന്നുണ്ട്. ഇൻബിൽറ്റ് സോളർ പാനലുകളോടു കൂടിയെത്തുന്ന ഇത്തരം വിളക്കുകൾ സ്ഥാപിക്കാനും തുടർന്നുള്ള പരിപാലനവുമൊക്കെ വളരെ എളുപ്പമാണ്.