മേൽക്കൂരയിലെ പൂമ്പാറ്റ

കരിങ്കൽ ചുമരുകളും ഇൻവർട്ടഡ് ശൈലിയിലുള്ള മേൽക്കൂരയും ചേർന്ന് വ്യത്യസ്ത ഭംഗിയേകുന്ന വീടിന്റെ വിശേഷങ്ങൾ

ആദ്യത്തെ പ്രോജക്ട്. അത് എല്ലാവർക്കും എപ്പോഴും സ്പെഷലായിരിക്കും. മാളവികയ്ക്കും അങ്ങനെ തന്നെ. ആർക്കിടെക്ചർ അവസാന വർഷം പഠിച്ചു കൊണ്ടിരിക്കെയാണ് അമ്മയുടെ സുഹൃത്തായ സുഗേഷും അഞ്ജലിയും പുതിയ വീടിന്റെ രൂപകൽപന മാളവികയെ ഏൽപ്പിക്കുന്നത്. “മാളവികയുടെ ആദ്യ പ്ലാൻ കണ്ടപ്പോൾ തന്നെ ഞങ്ങളുടെ തീരുമാനം തെറ്റിയില്ല എന്നു മനസ്സിലായി. മാത്രമല്ല, ഞങ്ങൾക്ക് വീടിനെക്കുറിച്ചുള്ള ആഗ്രഹങ്ങളും അഭിപ്രായങ്ങളുമെല്ലാം കൃത്യമായി പറയാൻ പറ്റിയിരുന്നു,'' സുഗേഷ് പറയുന്നു.

 ട്രഡീഷനൽ വേണ്ട; കന്റെം പറിയും. ഇവ രണ്ടിന്റെയും ഇടക്ക് നിൽക്കുന്ന ട്രോപ്പിക്കൽ ശൈലിയോടായിരുന്നു വീട്ടുകാർക്ക് താൽപര്യം. പാലക്കാടൻ ഗ്രാമഭംഗിയുടെ പശ്ചാത്തലത്തിൽ രൂപകൽപന ചെയ്ത ഈ വീട്ടിൽ നിർമാണ സാമഗ്രികൾ തനതായ ഭംഗിയിൽ കൃത്രിമത്വമില്ലാതെ അവതരിപ്പിക്കാൻ ശ്രദ്ധിച്ചിട്ടുണ്ട്.

"ദ് ലീനിയർ ഹൗസ്' എന്ന് ആർക്കിടെക്ട് വിളിക്കുന്ന വീട് ഒറ്റനിലയിലാണ് ഒരുക്കിയിട്ടുള്ളത്. വീട്ടുകാർ തമ്മിലുള്ള അടുപ്പം ചോരാതെ സൂക്ഷിക്കുന്ന ഡിസൈൻ ആകണമെന്നതും ഒറ്റ നില മതിയെന്നതും വീട്ടുകാരുടെ ആഗ്രഹമായിരുന്നു.