മനസ്സിൽ നിറയും തിരുവോണത്തോണികൾ

ഒരു ഓണപാട്ടിലൂടെ മലയാളി മനസ്സുകളിലേക്ക് തുഴഞ്ഞു കയറിയതാണ് ഗായിക ചിത്ര അരുൺ. ഇനിയേത് ഓണം പിറന്നാലും ആ പാട്ട് മൂളുന്നവർ ഇവിടെയുണ്ടാകും...

"പുഴയുടെ തീരത്തൊരുത്രാട രാവിൽ വിസ്മയമോടെ ഞാൻ നിന്നു... പുഴയിലൊരാകാശം കണ്ടു മേലെ വാനിൽ പാൽപുഴ കണ്ടു തുഴയാതെ ഒഴുകിവരും തിരുവോണത്തോണികൾ കണ്ടൂ...

എന്ന ഓണപ്പാട്ട് ഓണക്കാലത്തിനൊപ്പം കലോത്സവവേദികളെയും കീഴടക്കി മുന്നേറാൻ തുടങ്ങിയിട്ട് അഞ്ചുവർഷമായി. ലളിതസുന്ദരമായ വരികളും മികച്ച ആലാപനവുമാണ് പാട്ടിനെ ജനപ്രിയമാക്കിയത്. ഈ പാട്ട് ആസ്വാദകർ ഏറ്റെടുത്തതോടെ ചിത്ര അരുൺ എന്ന യുവഗായികയെയും മലയാളക്കര മനസ്സിനോടു ചേർത്തു.

റെക്കോഡിങ് ഓണക്കാലത്ത്

ഒരു ഓണക്കാലത്തുതന്നെയാണ് പാട്ടിന്റെ റെക്കോഡിങ് നടന്നതെന്ന് ചിത്ര അരുൺ ഓർമിക്കുന്നു. ഗാനരചന രാജേഷ് അത്തിക്കയവും സംഗീതം ജോജി ജോൺസുമാണ് . സീഡി യുഗത്തിന്റെ അവസാനമായിരുന്നു അത്. ഒരു സീഡി ഇറക്കണമെങ്കിൽ പത്തു പാട്ടുകൾ വേണം. യുട്യൂബ് റിലീസാണെങ്കിൽ ഇപ്പോൾ ഒന്നോ രണ്ടോ പാട്ട് മതി. പത്തു പാട്ടുകൾ റെക്കോഡ് ചെയ്യാനുള്ള പ്രൊഡക്ഷൻ കോസ്റ്റ് എല്ലാവർക്കും താങ്ങാനാവുന്നതല്ല.

റിസ്കെടുത്ത് റെക്കോഡിങ്

അന്ന് വലിയ റിസ്കെടുത്താണ് ജോജി ചേട്ടൻ ആ പാട്ട് റെക്കോഡ് ചെയ്തത്. ആ ആൽബത്തിൽ നാല് പാട്ടുകളാണ് പാടിയത്. അതിനൊന്നും പ്രതിഫലം ഇല്ല. എനിക്കെന്നല്ല ആൽബവുമായി സഹകരിച്ച പലർക്കും പ്രതിഫലം നൽകിയിരുന്നില്ല. ജോജിച്ചേട്ടന്റെ ബുദ്ധിമുട്ട് അറിയാവുന്നതിനാൽ ആരും ചോദിച്ചുമില്ല. നല്ല പാട്ടുകൾ പാടാൻ പറ്റുക എന്നത് ഒരു അനുഗ്രഹമായാണ് കരുതിയിരുന്നത്.