પ્રશ્નઃ ‘આકાશથી ઊંચું કોણ?', જવાબ છેઃ ‘પિતા’

બાળકો જ્યારે મોટા થશે ત્યારે એમના જીવનમાં બધી નાની નાની વાતો માતા સાથે કરશે, પણ મોટી વાતો કરવા માટે પિતા જોઈશે.

- મિલી મેર

હમણાં એક સુંદર દશ્ય જોવામાં આવ્યું હતું. મંદિરની બહાર તડકામાં ઉતારેલા કોઈ પુરુષના બેઉં જૂતાંની અંદર નાનકડી દીકરીના નાના ગુલાબી ચપ્પલ મૂકેલાં હતાં. પિતા આમ સંતાનો માટે તાપ ઝીલે છે. યક્ષ યુધિષ્ઠિરને પૂછે છેઃ ‘આકાશથી ઊંચું કોણ છે?’ યુધિષ્ઠિર જવાબ આપે છેઃ ‘પિતાનું સ્થાન આકાશથી ઊંચું છે.’

મહાભારતના વનપર્વમાં પાંડવોના વનવાસમાં એક ઘટના બને છે, દ્રૌપદીને તરસ લાગે છે અને નજીકના સરોવરમાં પાણી લેવા માટે પહેલા નકુલ પછી સહદેવ, બાદમાં ભીમ અને અર્જુન જાય છે. પણ કોઈ પાછું નથી આવતું. છેવટે યુધિષ્ઠિર જાય છે તો પોતાના ચારેય નાના ભાઈઓને સરોવર કાંઠે મૃત જુએ છે. એટલામાં સરોવરનો સ્વામી એવો યક્ષ પ્રગટ થઈને કહે છેઃ ‘તારા આ ચારેય ભાઈઓએ મારા પ્રશ્નોના જવાબ આપવાની ધીરજ રાખ્યા વિના પાણી પીવાની ચેષ્ટા કરી, એમાં ચારેય મૃત્યુ પામ્યા છે, હવે તારે પાણી ભરવું હોય તો પહેલાં મારા પ્રશ્નોના જવાબ આપ.’

પછી યક્ષ સંખ્યાબંધ પ્રશ્નો કરે છે અને યુધિષ્ઠિર એના ઉત્તર આપે છે. આપણે અહીં જે પ્રશ્નોત્તરથી વાત શરૂ કરી એ પણ પૂછાયો અને યુધિષ્ઠિર જવાબ આપ્યો.