કૅમેરા સામે થતા કાતિલ કાંડની ભીતરમાં..

પહેલાં ફ્રેન્ડ રિક્વેસ્ટ મોકલી, પછી ફ્રેન્ડશિપને ફેસબુક-લાઈવ કરી હત્યા કરીઃ મુંબઈમાં એક ‘સમાજસેવક’ મોરિસ નોરોન્હાએ ભૂતપૂર્વ નગરસેવક અભિષેક વિનોદ ઘોસાળકરની લાઈવ સ્ટ્રીમિંગ દરમિયાન હત્યા કરી ને પછી આત્મહત્યા કરી. શું ખરેખર આમ જ બન્યું હશે? સીસીટીવી કૅમેરા તો આમ જ કહે છે.

- કેતન મિસ્ત્રી (મુંબઈ)

૫ ડિસેમ્બર, ૨૦૨૩ઃ જયપુરમાં રાજપૂત કરણી સેનાના પ્રમુખ સુખદેવસિંહ ગોગામેડીની ભરબપોરે એમના જ ઘરે ગોળીઓ મારીને હત્યા કરવામાં આવી, જેમાં એક હત્યારાનું પણ મોત થયું. આ આખી ઘટના સીસીટીવી કૅમેરામાં ઝડપાઈ.

                                      ■ ■ ■

૨ ફેબ્રુઆરી, ૨૦૨૪: મુંબઈના છેવાડે આવેલા ઉલ્હાસનગરના એક પોલીસસ્ટેશનના સિનિયર ઈન્સ્પેક્ટરની કૅબિનમાં વિધાનસભ્ય ગણપત ગાયકવાડે શિવસેનાના નેતા મહેશ ગાયકવાડ અને અન્ય એક વ્યક્તિ પર ગોળીબાર કર્યો. મહારાષ્ટ્રમાં સત્તાધારી ભાજપના વિધાનસભ્ય ગણપત ગાયકવાડે જમીનવિવાદમાં મુખ્ય પ્રધાન એકનાથ શિંદે જૂથના નેતા મહેશ ગાયકવાડ પર કરેલા ગોળીબાર બાદ બન્ને જૂથ વચ્ચે નારાજી ઊભી થઈ છે. ઉલ્હાસનગરના આ પ્રકરણ પછી રાજકારણમાં ગરમાટો આવ્યો છે... અને આ આખી ઘટના પણ કૅમેરામાં કેદ થઈ છે.

                                    ■ ■ ■

૮ ફેબ્રુઆરી, ૨૦૨૪: મુંબઈમાં ઉદ્ધવ બાળ ઠાકરેની શિવસેનાના ભૂતપૂર્વ કૉર્પોરેટર, ૪૧ વર્ષી અભિષેક ઘોસાળકરની હત્યા ૪૮ નોરોન્હા ધડાધડ ગોળીઓ છોડીને કરે છે. એ વખતે બન્ને ફેસબુક પર લાઈવ હોય છે અર્થાત્ બન્નેની મુલાકાત સેંકડો લોકો ફેસબુક પર જોઈ રહ્યા હોય છે. થોડી વાર પછી મોરિસ એ જ પિસ્તોલથી પોતાને શૂટ કરે છે.

                                    ■ ■ ■

છેલ્લા થોડા સમયથી દેશભરમાં એવા અનેક ક્રાઈમ થયા, જે રીતસરના કૅમેરામાં ઝડપાયા હોય. સવાલ એ કે શું હત્યારાઓને ખબર નહીં હોય કે કૅમેરા એમનું કૃત્ય ઝડપી રહ્યો છે? હજી ગયા શુક્રવારે, ૯ ફેબ્રુઆરીએ દિલ્હીના નજફગઢ વિસ્તારના એક બ્યુટી સેલોમાં વાળ કપાવવા ગયેલા બે યુવાનોની ગોળી મારીને હત્યા કરવામાં આવી. એ ઘટના પણ સોશિયલ મિડિયા પર વહેતી થઈ. બીજો સવાલ એ કે કારણ ગમે તે હોય, આજે રવિવાર છે તો વાળ કપાવી આવું જેટલી સહજતાથી લોકો કેવી રીતે બીજાની હત્યા કરી નાખતાં હશે? કેવી રીતે એમને હથિયાર મળી જતાં હશે?