દીકરીને ભણાવવી કે ઝટ પરણાવી દેવાની?

ગામ-શહેર કે દેશબહાર ઉચ્ચ અભ્યાસ માટે જતી વિદ્યાર્થિનીઓની વધતી સંખ્યા સૂચવે છે કે...

- ડૉ. મિતાલી સમોવા

ક્યારેક  આપણે કોઈ પુરુષને એવી ફરિયાદ કરતાં સાંભળીએ છીએ કે એની પ્રેમિકા કે પત્નીને એની પાસેથી બહુ અપેક્ષા છે, એને બહુ બધે ફરવું છે, ખાવું છે, પહેરવું-ઓઢવું છે, ખર્ચો કરવો છે, જીવનમાં મજા કરવી છે. મોટે ભાગે પુરુષો પોતાની પ્રેમિકા કે પત્નીની આવી માગને એ વધુપડતી ડિમાન્ડિંગ છે એમ માની લેતા હોય છે, પણ એ પાછળની સ્ત્રીની પરિસ્થિતિ, સામાજિક કન્ડિશનિંગ અને માનસિકતા સમજતા હોતા નથી. સાંસ્કૃતિક રીતે સ્ત્રીઓ માટે સંકુચિતતા ધરાવતા દેશમાં દીકરી જન્મે ત્યારથી એને સતત એના કૌમાર્ય માટે સાચવીને ઘરમાં જ રાખવાની મા-બાપની, પરિવારની અને તદ્દન અજાણ્યા એવા સમાજની પણ વૃત્તિ જોવા મળતી હોય છે. દીકરીને આપણે સતત એવું જ કહીને ઉછેરીએ છીએ કે તારે જે કરવું હોય એ બધું તારાં લગ્ન પછી કરજે... એટલે જે દીકરીઓ પ્રમાણમાં લિબરલ કહી શકાય એવા પરિવારોમાં ન ઊછરી હોય એ તમામમાં પોતાના પ્રેમી કે ભાવિ પતિ પાસેથી અમુક અપેક્ષા ઠાંસી ઠાંસીને ભરી હોય એમાં કોઈ પ્રકારની નવાઈની વાત જ ન ગણાય.