થાબડી પેંડા છે આ ગામની ઓળખ

વરસના કોઈ પણ દિવસે અહીં રસ્તાની બન્ને બાજુ પથરાયેલી દુકાનબહાર ભઠ્ઠી પર કોઈ ને કોઈ તાવડામાં દૂધ ઉકાળતું દેખાય. એની સુગંધ એવી કે મોંમાં પાણી આવ્યા વગર રહે નહીં. સાડી ઉદ્યોગ માટે જાણીતા જેતપુર પાસેના નાનકડા દેવકી ગાલોળ ગામના અનેક પરિવાર માત્ર પેંડાના વેપાર પર નભે છે.

- દેવેન્દ્ર જાની (રાજકોટ)

પેંડા... આ નામ પડે એટલે ભલભલાને ઘડીભર (ડાયાબિટીસ જેવી વ્યાધિ ભૂલીને પણ...) એ આરોગવાની ઈચ્છા થઈ જાય, કારણ કે આ આઈટેમ જ એવી છે. કોઈ પણ શુભ પ્રસંગ આવે એટલે ગુજરાતીઓ ગળ્યું મોઢું કરવા (અને કરાવવા) માટે પેંડા ખરીદવા ઉતાવળા થઈ જાય. આમ જોઈએ તો પેંડા માટે હવે કોઈ પ્રસંગની પણ જરૂર રહી નથી. ઘણા લોકો એમ ને એમ, મીઠાઈની દુકાને ઊભા ઊભા પણ પેંડા પેટમાં પધરાવી લે છે. સૌરાષ્ટ્રમાં તો પેંડાને કારણે કેટલાંક ગામોની ઓળખ બદલાઈ ગઈ છે, જેમ કે રજવાડી પેંડાની ચર્ચા નીકળે એટલે કુવાડવા યાદ આવે. જો કે અહીં વાત છે થાબડી પેંડાથી ઓળખાતા એક ગામની.

રાજકોટથી પરબધામ જવા જેતપુરથી એક રસ્તો અલગ પડે છે. એ રસ્તે આશરે ૨૦ કિલોમીટર આગળ વધો એટલે વળાંકમાં દેવકી ગાલોળ ગામનું પાટિયું આવે. ગામના પાદરમાં જ સડકની બન્ને બાજુ ભઠ્ઠી પર મોટા તાવડામાંથી ધુમાડા નીકળતા જોવા મળે. રસ્તાની બન્ને તરફ પથરાયેલી દુકાનોમાં એકસરખું દશ્ય. પહેલી વાર અહીં આવે તો કોઈને પણ અચરજ થાયઃ આટલી બધી દુકાનની ભઠ્ઠી પર એવું તે શું બનતું હશે? પણ થોડી ક્ષણમાં મસ્ત મજાની સુગંધ જ એ અચરજનો ઉત્તર વાળી દે. તેમ છતાં કુતૂહલવશ કોઈ વેપારીને પૂછીએ તો તરત જવાબ મળેઃ થાબડી પેંડા!

હા, ગામના પાદરમાં જ અનેક વેપારી થાબડી પેંડા બનાવે છે. આખો દિવસ તાવડામાં દૂધને ઉકાળીને પેંડા બનાવવાનું કામ અહીં ચાલે છે. ગીર, સતાધાર કે પરબ જતા લોકો આ ગામની પાદરમાં ઊભા રહીને થાબડી પેંડાનો સ્વાદ માણે છે અને ઘર માટે પણ લઈ જાય છે.