ચલ મેરે ઘોડે ટિક ટિકટિક...

નાનપણમાં મુંબઈના દરિયાકિનારે ઘોડેસવારી કરતાં કરતાં એને અશ્વો સાથે જાણે પ્રેમ થઈ ગયો. વર્ષો પછી અને લગ્ન પછી અનાયાસ એક ઘોડો પાળવાનું નક્કી કર્યું. એક પછી એક કરતાં આજે બાર ઘોડા એમના સ્ટડમાં છે. આપણે ત્યાં અશ્વના માલિક, સંવર્ધક અને ટ્રેનર કોઈ સ્ત્રી હોય એવું જ્વલ્લે જ સાંભળવા મળે. જામનગરનાં આ મહિલા છે એમાંનાં એક.

- પાર્થ સુખપરિયા

રાજસ્થાનનું પુષ્કર શહેર વિશ્વભરમાં બ્રહ્માના એકમાત્ર મંદિર માટે જાણીતું છે. લાખો શ્રદ્ધાળુઓ આ પવિત્ર ધામની મુલાકાતે આવે છે. પુષ્કરનું ઓર એક આકર્ષણ એટલે ત્યાં યોજાતો પશુમેળો. પુષ્કરમાં ઊંટ અને અશ્વોની મોટી બજાર ભરાય છે.

હમણાં પુષ્કરમાં યોજાયેલા હોર્સ શોમાં અસાધારણ પ્રતિભા પ્રદર્શન ધરાવતા દસ વછેરામાં જામનગરના અશ્વ પરમરાજનું નામ ચમક્યું. એના વિશે ચર્ચા પણ બહુ થઈ. એનું કારણ એ કે આ ઘોડાના માલિક, સંવર્ધક અને પ્રશિક્ષક એક મહિલા છે!

સામાન્ય રીતે અશ્વની વાત આવે તો, આ પુરુષપ્રધાન કાર્યક્ષેત્રમાં વધુમાં વધુ કોઈ મહિલા અસવાર હોય એવું બને. જો કે અશ્વના માલિક, સંવર્ધક અને ટ્રેનર કોઈ સ્ત્રી હોય એવું જ્વલ્લે જ સાંભળવા મળે. જામનગરનાં ભાવનાબહેન કારિયા એમાંનાં એક છે. જામનગર નજીકના ખીજડિયા ગામમાં આશરે બાર વીઘાં જમીનમાં ભાવના કારિયાએ એમના પતિ સાથે રાજલ સ્ટડ ફાર્મ બનાવ્યું છે, જ્યાં નાના-મોટા બાર ઘોડા અત્યારે ઊછરી રહ્યા છે.

મૂળ રાજસ્થાનના ટોંક નગરનાં વતની અને રાજપૂત ઘરાનામાંથી આવતાં ભાવનાબહેનનાં પ્રેમલગ્ન પોરબંદરમાં વસતા લોહાણા મિલિંદ કારિયા સાથે થયાં છે. આ પતિ-પત્ની, બન્નેને નાનપણથી જ ઘોડાનો શોખ. બાળપણમાં ભાવના મુંબઈમાં જુહૂ ચોપાટી પર ફરવા જાય ત્યારે ચકરડા (ફજેત ફાળકા) કે બીજી કોઈ રાઈડમાં બેસવાના બદલે ઘોડેસવારી કરવાનું વધુ પસંદ કરે. બીજી બાજુ, મિલિંદ એના પિતા સાથે પોરબંદરના મહેલમાં માલસામાન આપવા જાય ત્યારે રાજાના ઘોડા જોતા અને એમને પણ ખૂબ જ આકર્ષણ રહેતું.

ભાવના કારિયાનું ભણતર તો બી.કૉમ. અને એલએલબી. જો કે વકાલતને બદલે એમણે પત્રકારત્વનો અભ્યાસ કર્યો. એ પછી એ મુંબઈના એક ફિલ્મ મૅગેઝિન માટે કામ કરતાં. પછી ભચાઉ (કચ્છ) શિફ્ટ થઈ ત્યાં શિક્ષણને પોતાનું કર્મક્ષેત્ર બનાવ્યું અને ત્યાર બાદ જામનગર આવ્યાં, તો અહીં પણ શિક્ષક અને ગુરુકુળમાં પ્રિન્સિપાલની જવાબદારી નિભાવી.